Сумар дня на 22. листопада/новембра 2019 р.

Приносиме вам сумар медияльной ґрупы ЛЕМ.фм+ на ден 22. листопада/новембра 2019 р.

Потяг з Лемковины на Захід

Хвилю тому інформували сме о новых желізницьовых получынях через Любін і Ліґницю. Натоміст єден зо слухачів радия спостерюг, о чым сме не повіли, што додатково од нового розкладу іздил буде нічный потяг, котрый получыт Лемковину з Заходом. Його назва то потяг Пoгіря реляциі Вроцлав-Загіря-Вроцлав. Свойом трасом обнимат Катовиці, Краків, Тарнів, Стружы, одкале част піде на Креницю (через Ґрибів, Санч і Мушыну), а част на Загіря (через Біч, Ясло, Санок). Окрем того в Кракові буде мож пересісти ся на потяг до Варшавы. Хоц новый розклад ізды має ввойти в жытя 15. грудня/децембра, то заблокувано можливіст купувати білеты на получыня по 12. грудня/децембра. Вшытко через ленію Варшава-Ґданьск, для котрой треба змінити розклад, бо в остатнім моменті вказало ся, што потяг не може піти гын зо скорістю до 200 км/г і необхідны сут додатковы ремонты. Од віторка, 19. листопада/новембра, желізниця зачала одблоковувати продаж білетів на некотры получыня, м.ін. такы, котры дозваляют резервацию місц в святочным періоді.

Роботы клястра енерґіі «Біла-Ропа» рушат

Початком того рока, в уряді ґміны Мощениця, лідера клястра енерґіі «Біла-Ропа», підписано догваріня, завдякы котрому до ґорлицкого повіту мало трафити більше як 20 млн зл дотациі. Вшытко на одвертальны джерела енерґіі. Вартіст цілого проєкту то 36 млн зл. Інвестиция мала закінчыти ся 30. червця/юнія 2020 р., а реальні скінчыт ся найпевнійше о рік. Проблемы зачали ся при конкурсах на выбраня компаніі, котра мала бы зрыхтувати інсталяциі одвертальных джерел енерґіі. До конкурсу приступили дві фірмы: з Кракова і Варшавы, двакратні уневажнено поступуваня, обі фірмы обвинювали ся в неправильностях. Повідомлено прокуратуру, котра по провіріню анулювала дальше поступуваня досліджыня. Коли пошкодувана фірма зложыт зажаліня, має на тото 7 дни, прокуратор буде мусіл го розсмотрити. Надзір над інвестицийом буде конец-кінцьом полнила краківска фірма, котрій шефує Цецилия Чоп. Нарядя до вытваряня зеленой енерґіі буде замонтуване м.ін. на обшыри ґміны Санкова, Ропа та Устя Рускє.

«Фольковы Миколайкы» од будучой пятниці

Од 29. листопада/новембра до 1. грудня/децембра в Люблині проходила буде 29. едиция акциі «Фольковы Миколайкы», інтердисциплинарной подіі, яка присвячена єст ріжным аспектам традицийной культуры, хоц предовшыткым є то фестіваль фольковой музикы. Фествіаль одкрыє наукова конференция про ґенезу і проявы народной штукы в музиці, літературі і театрі, про народну штуку вчера і днес. Тіж в пятницю одбуде ся вернісаж поконкурсовой выставы «Традиция в обєктиві». Музична част зачне ся од конкурсу «Одкрыта Сцена», звіздом вечера буде польско-украіньска Даґадана. Субота то м.ін. варштаты ромскых і угорскых танців, африканьскых пісен, гры на смыковых інструментах, але тіж головный концерт. Запрезентуют ся Калакан з Краю Басків, Ромено з Мадяр та ґаздове – Оркєстра св. Миколая. В неділю продолжаны будут варштаты, дале доступный буде ярмак з розмаітыма ручныма выробами, а на конец выступит Намґар, вокалистка і інструменталистка з Бурятиі з Сибіра.

«Лемківска садиба» одремонтувана

Етноґрафічный Музей «Лемківска садиба» в селі Зарічево на Закарпатю завершыл реставрацию свойой хыжы. Зінвентаризувано тіж предметы музею і проведено консервацию окремых експонатів. «Лемківска садиба» основана была в 1985 р. через локальну соспільніст, жебы представити жытя Русинів Закарпатя. Хыжа вознесена была в 1902 році. В грудни/децембрі минулого рока «Лемківску садибу» взял під аренду на три рокы Закарпатскій Музей Народной Архітектуры і Штоденного Жытя. На яр того рока музейны консерваторы зачали вести роботы звязаны з реставрацийом, консервацийом, хімічным чыщыньом цілого обєкту та окремых експонатів, вымінено і ціле покрытя даху. Дальшы роботы продолжаны будут в 2020 році. В плянах є ремонт підвалин, выглядів, побіліня стін в середині і назовни. Окрем реґулярной музейной функциі, в скансені орґанізуваны сут пробы і стрічы ансамблю Лемківчанка.