Сумар дня на 22. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 22. грудня/децембра 2021 р.

Лемківскы різдвяны традициі в зеленогріскым скансені в Охли

В минулу суботу в зеленогріскым скансені в Охли мож было почути смак різдвяных свят. Своі традицийны стравы зрыхтували буковіньскы ґуралі і Лемкы. При добрі знаных нам кєселици, грибах, капусті появили ся традицийны для буковіньскых ґуралів м.ін. пляцінты, значыт дріжджовы булочкы, ци пшеничка – поливка з пшениці. Подля традициі буковіньскы ґуралі танцювати зачынают на другій ден свят. На суботній стрічы лемківскы коляды запрезентувал і про різвдвяны звыкы оповіл ансамбль Розтока. На конец кажда дітина отримала святочный подарок.

ViaCarpatia што раз ближе Лемковины

23. грудня/децембра прошла відеоконференция віцеміністра інфраструктуры Рафала Вебера. Єй темом было оголосити конкурс оферт на реализацию двох одтинків пути ViaCarpatia (експресовой дорогы С19/S19). Оголошыня тыкат запроєктуваня і побудуваня експресовой дорогы на одтинку од розъізду Іскшыня до розъізду Місце Пястове, та запроєктуваня і побудуваня експресовой дорогы на одтинку од розъізду в Місци Пястовым до розъізду в Дукли. Оба одтинкы по близко 10 км. На опрацуваня проґрамовой концепциі з полным ґеолоґічным розпознаньом жде фраґмент в цілости ведучый через Лемковину – од Дуклі до Барвінка. Подля посла Адама Снєжека (Śnieżeka) во вшыткых ґмінах, якы находят ся вздолж С19/S19, зачне ся інвестицийный бум, будут появляти ся новы бізнесы, новы місця роботы. Посол Пьотр Урускій додал, што С19/S19 створит новы розвитковы перспективы для полудньовой части підкарпатского воєвідства. Анджей Бытнар, бургомайстер Дуклі подал, што вшыткы нетерпеливі ждут на одкрытя інвестициі. Додал тіж, жебы памятати влучыти воєвідску дорогу 993 Дукля-Ґорлиці до реченой експресовой С19/S19.

Потягы Ліґниця-Любін-Польковиці-Ґлоґів та Ліґниця-Любін-Рудна-Ґлоґів што 30 минут

Остаючы при комунікацийній темі – Нижньошлезска Служба Доріг і Желізниці во Вроцлаві оголосила конкурс оферт, жебы опрацувати передпроєктову документацию для Аґломерацийной Желізниці Мідьового Басену. Подля експертів і представників самоурядовців, є то величезный крок на дорозі урухомліня желізницьового получыня на трасі Любін – Польковиці – Ґлоґів. Опрацуваня документациі м.ін. вкаже, кадиль докладні буде ішла нова желізницьова ленія, якы буде мала технічны параметры та в якых локализациях будут находити ся пристанкы. Документация має быти готова до кінця 2023 рока. Ведены будут так само соспільны консультациі в справі м.ін. локализациі пристанків. Єдна ленія буде обнимала трасу Ліґниця-Любін-Польковиці-Ґлоґів, з курсуваньом што 30 минут, а друга: Ліґниця-Любін-Рудна-Ґлоґів. З частотом курсуваня на трасі Ліґниця-Любін што 15 минут.

Ґалерия угорскых королів в полній красі

В просторах Выгорлятского Музею продолжыли реставрацию декораций вынятковой Ізбы Угорскых Королів. Тоты діяня повели ся завдякы фінансуваню Міністерства Культуры Словацкой Республикы в рамках ґранту «Одновме свій дім». В Ізбі помістят одновлены образы, котры творят комплетну ґалерию угорскых королів. Проходячый ремонт был семым етапом одновы єдного зо штырьох захованых просторів ренесансового каштеля. Його цілю было скінчыти послідню част декораций з кінця XVIII ст. і помістити єй на східню стіну споминаной Ізбы. Ізба Угорскых Королів є словацкым унікатом, бо є єдином комплетном ґалерийом угорскых королів од Ґейзы І по Марию Тересу.