Сумар дня на 22. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 22. грудня/децембра 2020 р.

 Трансграничны біциґльовы трасы з Полонин в Бєщады

Рыхтує ся нова туристична атракция для любителів гірскых подорожы по Бєщадах і не лем. В рамках проєкту «Porta Rusica – з Полонин в Бєщады», партнерами якого сут Ліскій Повіт, Лісництво Улич зо Словациі та Надлісництво Тисна, возникнут трансграничны біциґльовы трасы під таком самом назвом, што проєкт. Разом буде то коло 50 км новых пути, в тым 14 км презначеных на трасу типу singletrack. Доцільово новы трасы будут мати вельо функций, м.ін. будут зеленым корытарьом для незмоторизуваных, мают промувати здоровый спосіб жытя, еколоґічне подорожуваня та служыти як нарядя до охороны реґіональной спадковины. Цілю проєкту єст выкорыстати природничый і культуровый потенциял польско-словацкого погранича, в головній мірі через новы біциґльовы трасы. Porta Rusica навязує до історичного трактату, котрый лучыл Михалівці з Балигородом і ішол через Рускє і Розтокы. Пут з Полонин в Бєщады богата буде в атракциі, на трасі находити ся тіж будут видоковы колибы, з котрых мож буде обзерати цінный трансграничный краєвид. Зо взгляду на пандемію і звязаны з ньом ограничыня проєкт продолженый буде до вересня/септембра 2021 рока. Кошт проєкту то 2,1 млн евро.

«Етно Малопольща» о Лемках

В суботу, 19. грудня/децембра, на каналі TVP Краків прошла премєра нового одтинка «Етно Малопольща», котрый тым разом тыкал ся Лемків. Авторком образу єст Інка Боґуцка. Од 2008 рока звязана єст з TVP Краків, де реализує соспільны, психолоґічны репортажы і документальны і етноґрафічны фільмы. Єй продукциі были номінуваны і нагороджуваны на многых фільмовых фестівалях. В 2014 році была номінувана до престіжовой журналистичной нагороды Grand Press, а в 2015 отримала І Нагороду Журналисты Малопольщы за репортаж «Непотрібный творця». В єй теперішнім проєкті о Лемках презентуваны сут давны лемківскы ремесла, м.ін. вырабляня лжыц в Новици, професия мазяря з Лоси, ци загально темы істориі, культуры і традициі. Сценарий тіж не єст припадковый. В часі обзераня образу мож буде подорожувати од церкви в Бортным ци Ганчові через сандецкій скансен до Музею Никыфора. О Лемках оповідают етноґрафы, але і знаный лемківксій поета Петро Мурянка. Представлена єст тіж тема різдвяных свят і звязаных з нима традиций. Музичну оправу для фільму дал ансамбль Руты Увіты, котрый запрезентувал ся не лем в традицийных лемківскых піснях, але і колядах ци весільных співанках. Одтинок «Етно Малопольща» о Лемках мож видіти днес о год. 19.10 на каналі TVP Краків або на каналі YouTube Малопольской Телевізиі.

Ревітализация головной плыты креницкого дептака уж в 2021 році

15 млн зл – тілько вынесе ревітализация головной плыты креницкого дептака, што заплянувана єст на 2021 рік. Буде то єден з остатніх етапів ремонтовых прац в гірскым курорті. Будучы працы на дептаку тыкают ся зміны верхньой верствы, ремонту канализациі та одновы амфітеатру і освітліня. Ревітализация можлива єст завдякы отриманому близко 11-мілийоновому дофінансуваню, в 2017 році было то коло 6 млн зл, але потрібна была додаткова підпора, яку місто отримало од Урядового Фонду Локальных Інвестиций в высокости дальшых 5 млн зл. Як повіл бургомайстер Крениці, Пьотр Рыба, ремонтовы працы на дептаку зачнут ся уж в першій половині 2021 рока.

Подорож по лемківскій кухни з Едитом Вільк

Зближат ся фінал Великой Оркєстры Святочной Допомогы. З той нагоды Едита Вільк выставила на інтернетову авкцию подорож для 5 осіб по лемківскій кухни. В рамках подорожы буде можливіст одвидіти музей Народного Будівництва в Саноку в дакус інчій формі, бо «од кухні». Пак пройде прелекция на тему Лемків, особливо іх страв і рецептур, а вкінци буде деґустация. Едита Вільк єст редакторком в «Саноцкым Тыжденнику» і провідничком в музею в Саноку, а окрем того великом любительком варіня. Своі пасиі получыла в дипломовій роботі о смаках Лемковины.