Сумар дня на 22. червця/юнія 2021 р.

Приносиме вам сумар медияльной ґрупы ЛЕМ.фм+ на ден 22. червця/юнія 2021 р.

Едукацийно-Етноґрафічный Парк новом атракцийом Шымбарку

В Скансені Погіряньского Села в Шымбарку в пятницю, 18. червця/юнія, одкрыто едукацийный парк істориі народного будівництва та машын з польско-словацкого погранича. В парку находят ся зреконструуваны нарядя і цілы обєкты, м.ін. колиба з хлібовыма пецами ци ковальскій міх. Ціліст єст так запроєктувана, жебы корыстати могли з ней наймолодшы і непелносправны особы. Разом з презентацийом новой атракциі ґорлицкого повіту офіцийні одкрыто тіж выставу «Погіряны і сусіды – народне облечыня з реґіонів Польщы і Словациі», котра вказує святочне народне облечыня Погірян, Лемків, Сандецкых Ляхів, Спишаків і Шаришан. В подіі взяли участ урядникы малопольского воєвідства, в тым маршалок Вітольд Козловскій. Як підкрислил, ідея едикацийного парку зреализувана Музейом Дворы Карвациянів і Ґладышів дозволит не лем підтримати нацийональну спадковину, але тіж розвивати реляциі з нашыма сусідами Словаками.

Европа Карпат – якє буде будуче Підкарпатя і Малопольщы?

В суботу, 19. червця/юнія, в Реґетові, коло Устя Руского прошла 29. конференция Европа Карпат. Політикы, науковці та самоурядовці з ріжных держав бесідували м.ін. на тему рільництва, туристикы, будучой спілпрацы в Европі ци Карпатской Стратеґіі, котра в іх опініі єст шансом на розвиток Підкарпатя і Малопольщы. Основом Карпатской Стратеґіі сут штырі головны обшыри діяня: чыста індустрия, зрівноважена туристика, в тым особлива підпора сельской, здравотной і екотуристикы, розвиток карпатскых клястрів та екосистем інновациі. Важным пунктом в Стратеґіі єст промоция реґіональных продуктів м.ін. через вводжыня спільного карпатского ознакуваня продуктів. В часі творіня Стратеґіі особливый натиск кладено на охорону середовиска. Бесіда о передуманым ґаздуваню натуральныма засобами, охороні ґатунків ци творіню трансграничных, еколоґічных корытарів для дикой звірины.

Нова думка на цікаве одвиджаня Етноґрафічного Музею

Етноґрафічный Музей в Кракові зрыхтувал нову атракцию для наймолодшых – етностежкы. То зостав карт з ілюстрациями, цікавостками ци задачами. Кажда карта бесідує о єдным предметі, што находит ся в збірці постійной выставы в Музею. Цілю акциі єст заінтересувати діти та вказати ім і заохотити в інчый спосіб одвиджати музей. Етностежкы мож купити в двох версиях «На тропі» або «Порадиме собі». Перша версия направлена єст на любителів звірят, друга єст для цікавых што, як і чом. Обі версиі мож купити в музеальній касі, а з нагоды зачынаючых ся внет вакаций од 29. червця/юнія до 3. липця/юлия до білету для каждой дітины в віку од 3 до 10 років єдна з етностежок до выбору єст як подарок.

Театральна ґрупа з Устя Руского запрезентує собітковый пленеровый спектакль

Театральна ґрупа Племя ведена Моніком Бабульом просит в найблизшу суботу, 26. червця/юнія, на собітковый пленеровый спектакль пн. «Кохановскій, Кохановскій оджен нашы вшыткы старункы». Пєса оповідат о любови і як ґарантуют орґанізаторы – буде не лем поважні, але тіж весело. О музичну оправу задбат вокальный ансамбль Cantori, а почастунок зрыхтує Сельскій Кружок Ґаздынь з Устя Руского. Спектакль зачне ся о 20.00 год. за стадийоном Орлик над ріком Ропом в Устю Рускым.