Сумар дня на 21. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 21. жолтня/октобра 2020 р.

Меншынова сторона Спільной Комісиі Уряду та Нацийональных і Етнічных Меншын хце од уряду підпертя

Представникы меншыновых і етнічных орґанізаций в Польщы «в обставинах пошырюючой ся пандеміі» апелюют до уряду Польской Республикы обняти позаурядовы орґанізациі системом підпоры в формі незворотных пожычок. Так як ся діє «в інчых просторах соспільного жытя». Такє становиско поміщено в писмі меншыновой стороны Спільной Комісиі Уряду та Нацийональных і Етнічных Меншын. Пишут в ним дале, што пандемія коронавіруса значучо влинула на функцийонуваня меншын і што орґанізациі сут переважно позбавлены постійного джерела фінансуваня свойой діяльности, а можливости здобываня середків на актуальну діяльніст радикальні ся зменшыли. Меншынова страна Комісиі звернула ся з прошыньом збільшыти высокіст середків презначеных в 2021 році на підметовы дотациі, аж і товды, коли буде то означало зменшыня середків на цільовы дотациі.

Новый крижевацій єпископ

В суботу, 17. жолтня/октобра, проходила єпископска хіротонія нового крижевацкого єпархіяльного єпископа, владыкы Міляна Стіпіча. Торжество рукоположыня прошло в екстерєрных просторах перед Катедральным Собором Пресвятой Тройці в Крижевцях в Хорвациі. Головным святительом нового грекокатолицкого єпископа был емеритуваный крижевацкій єпарха владыка Миколай Кекіч, разом з ним на нового єпарху рукы поклали і загребскій римокатолицкій архієпископ і митрополита кардинал Йосиф Бозанич та апостольскій нунций в Хорвациі Джорджо Лінґуа. На суботній подіі присутны были і представникы державы і інчых церкви. Крижевацка єпархія в Хорвациі має і русиньскых вірных, была она основана в 1777 році для грекокатолицкых вірных ріжных нацийональности, котры жыют на обшыри Хорвациі, Словениі та Босні і Герцеґовины.

Директор Выгорлятской Звіздарні доціненый

16. грудня/децембра пройде переданя публичных нагорід Пряшівского Самосправного Краю за 2020 рік. Лавреатами остали: академіцкій різбяр Штефан Коваль, лікар Мариян Кріж та директор Выгорлятской Звіздарні Ігор Кудзей. Выбрано іх спосеред 17. номінуваных. Депутаты Пряшівского Самосправного Краю нагороду для директора Выгорлятской Звіздарні в Гуменным Ігоря Кудзея признали за ціложытьовый вклад в пропаґуваня астрономіі і великій вклад в розвиток астрономічного комплексу з европейскым значыньом в Колоницкым Сідлі. Тота обсерватория находит ся на териториі Парку Темного Неба медже русиньскыма селами Колониця і Ладомирів. Якіст колоницкого неба спричынила, што є то місце здобываня высокоякістных науковых даных, окрем того притігат астротуристів. Вчас ґалі вручаня нагорід Пряшівского Самосправного Краю будут переданы і Оцініня Председы ПСК, о котрых вырішыт жупан Мілян Маєрскій.

Вмер бывшый предстоятель Православной Церкви в Америці владыка Теодозий (Лазор), по роді Лемко

В понедільок, 19. жолтня/октобра, на 87 році жытя вмер владыка Теодозий (Лазор), архієпископ Вашынґтону, митрополита цілой Америкы і Канады, бывшый предстоятель Православной Церкви в Америці. Покійный владыка по роді был Лемком. Вродил ся в родині еміґрантів зо східньой Лемковины зо сел Воля Михова і Смільник. В роках 1977-2002 очелювал Православну Церков в Америці. Митрополита Теодозий вродил ся 27. жолтня/октобра 1933 р. В 1960 р. завершыл богословскы студиі в православній семінариі св. Владиміра в Ню Йорку. Дальше продолжал науку в Екуменічным Інституті в Боссе в Швайцариі. В маю 1970 р. стоял на челі делеґациі православных Американів, якы одобрали в Москві томос про автокефалию Православной Церкви в Америці. В тым же році спілорґанізувал канонізацию преподобного Германа Алясканьского. Од 1972 р. служыл як владыка Пітсбурґа і Західньой Пенсильваніі, а 1977 р. на 5. Всеамериканьскым Соборі в Монтреали был выбраный за предстоятеля Православной Церкви в Америці. Признано му званя Блаженнійшого Архієпископа Нюйоркского, митрополиты цілой Америкы і Канады.