Сумар дня на 21. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 21. вересня/септембра 2023 р.

Конференция східніх католицкых єпископів в Грециі

Як інформує Пресова Aґентура Конференциі Єпископів Словациі, в понедільок 18. вересня/септембра в місті Неа Макрі, в Грециі, зачала ся дальша з реґулярных стріч східніх католицкых єпископів Европы. Стріча орґанізує ся під покровительством Рады Европейскых Єпископскых Конференций. Домашнім єпископом, котрый гостит европскых владыків, є апостольскій еґзарха в Грециі Мануіль Нін. Словацию на стрічы репрезентує архієпископ Кірил Василь, кошыцкій єпарха, і владыка Мілян Лях, помічный єпископ братиславской єпархіі. Присутны сут і дальшы єпископы традициі Ужгородской Уніі, як наприклад владыка Ґеорґій Джуджар, єпархіяльный єпископ Єпархіі св. Миколая в Рускым Керестурі, ци владыка Атаназ Орос, мішколцскій єпарха з Мадяр. Пристуных є і двох грекокатолицкых владыків з Польщы – Владимір Ющак і Аркадий Трохановскій. Стріча кінчыт ся днес. В часі окремых засідань єпископы мали нагоду дискутувати о тым, яку мают ролю і місце східні католицкы церкви в сучасным світі.

Премєра фільму о Білій Воді

Припоминаме, што в днях 7.-8. жолтня/октобра одбуде ся премєра фільму під назвом «Біла Вода – призабыте село на шляку волошской культуры». Роботы над фільмом тырвали од мая т.р. Фільм має представляти долю і дншенє неістнуючого русиньского села Біла Вода, котре находит ся на Шляхтівскій Руси – енкляві штырьох лемківскых сел, в долині Руского Потока, одділеных од звертой Лемковины долином Попраду. Документ складат з парох елементів/сюжетів. Осю наррациі є вандрівка по долині Білой Воды бывшой жытелькы, котра оповідат о жытю і забудові выселеного в 1945 і 1947 р. села. Дальшым елементом істориі буде вказаня роботы двійкы студентів архітектуры Краківской Політехнікы, якы проєктуют особливу едукацийну стежку для села. Ціліст дополнена буде выповідями бывшых жытелів села, туристів, а тіж науковых експертів. Фільм дофінансуваный є Стоваришыньом Pro Carpathia в рамках проєкту Карпатскы Локальны Ініциятивы для Фундациі Забытый Світ. Продукцию реализує екіпа Фільмовой Аґениці ГАФ з Кракова, в склад которй входит м.ін. Кшыштоф Кжыжановскій, автор документів о Лемках. Як інформуют думкодавці фільму – неодолга дознаме ся більше деталів о плянуваных осінніх премєрах.

Варштаты іконописаня в Любіні

Православна парохія св. Тройці в Любіні рыхтує дальшу подію, яка одбуде ся осіню. В днях 16.-21. жолтня/октобра парохія просит на варштаты іконописаня, якы будут проходити каждого дня од 16.00 до 20.00 год. на любіньскым приходстві. Варштаты поведе о. Павел Заброцкій. Жебы взяти участ, треба записати ся найпізнійше до 9. жолтня/октобра, контактуючы ся з парохом о. Богданом Репелом. На сайті любіньской парохіі найдете потрібны інформациі. Лем припомнийме, што єст то чергова ініциятива любіньской церкви, яка посвячена є іконописаню. Влони проходили подібны варштаты.

Одкрытя нового академіцкого рока в Пряшові

Пряшівскій Університет офіцияльно вступил до нового академічного рока. Його святочне отворіня в історичній будові ПКО Чорный Орел при присутности близко 450 гости зо Словациі і заграниці в віторок несло в знаміню інавґурациі ректора, проректорів і нововыбраных деканів шестьох факультетів ПУ. Не бракувало ани оцініня робітників і студентів університету. Ректор Петер Коня в новым функцийным періоді поведе університет довєдна з проректорами Петром Адамішыном, Яном Бурґеровом, Іваном Цімермановом, Марийом Кардіс і Марияном Реіферсом. На ПУ діє наш факультет – Інститут Русиньска Языка і Культуры.