Сумар дня на 21. мая 2021 р.

Приносиме вам сумар медияльной ґрупы ЛЕМ.фм+ на ден 21. мая 2021 р.

Харватнік буде стерюг меншыновых прав

Прав меншын в Польщы буде стерюг Харватнік. На початку предовшыткым Кашебів. Є то соспільна кашебска ініциятива, яка має усвідомляти Кашебам іх права і провіряти, ци власти тых прав дотримуют. Як пояснят ініциятор проєкту, Матевиш Тітес Меєр з Кашебской Єдноты, цілю Харватніка єст є стеречы права Кашебів і інчых меншын жыючых в Польщы, записаных в законі про нацийональны і етнічны меншыны і в Европейскій карті языків. Подля Меєра, свідоміст прав, котры прислугуют Кашебам, як єдній з меншыновых соспільности в Польщы, єст барз низка. Доказом може быто хоц бы тото, як невельо осіб корыстат з права хоснувати кашебскоязычны особисты документы. Того рода прав є о вельо веце, што має быти популяризуване в рамках проєкту Харватнік. Меєр хоче довести і до основаня інституций, котры будут стеречы прав вшыткых меншын.

Зас заперта дорога Дукля-Ґорлиці

Од середы, 19. мая, до 2. червця/юнія тр. заперта буде дорога Дукля-Ґорлиці за Новым Змигородом. Причыном являт ся комплескова модернізация дорогы, што вымагат вылучыня трасы з руху. Ремонтуваный є одтинок од крижівкы при Народным Домi в Перегримці до мосту на потоку Клопітниця, о долгости понад кілометра. Обізд вызначыли через Ясло. Дорога была уж перше заперта, од половины квітня/апріля тр. Роботы мали товды тырвати два тыжні, єднак выдолжыли ся з огляду на планну хвилю. Выконавця робіт подає, што плянуваный термін одданя дорогы (тє. 2. червця/юнія тр.) може быти іщы перенесеный.

О меншынах бесідували в Малопольскым Центрі Досконаліня Учытелів

О красі лемківской і ромской меншыны бесідували в Малопольскым Центрі Досконаліня Учытелів в Новым Санчы. Культурны добра і вартости в добі пандеміі, та літературна творчіст учеників о нацийональных і етнічных меншынах, были основныма темами проходячой гын стрічы Марты Малец-Лех з заряду малопольского воєвідства. Вчас стрічы прошло торжественне вручыня нагорід лавреатам конкурсу «Культура нацийональных і етнічных меншын малювана словом – конкурс на верш або прозу». Участикы подіі мали нагоду м.ін. обізріти фраґменты фільму «Лемкы» зреализуваного Округовым Музейом в Новым Санчы.

Залив в Крампній буде опорожненый

Залив в Крампній, будучый головном атракцийом місцевости, буде в тым році опорожненый. Воду спущено з огляду на тырваючу при ним будову басенів. Інвестиция єст конечна, понеже вода в заливі не надає ся, жебы ся в ній купати. Гірска ріка зас го замулила і м.ін. з санітарных причын обовязує заказ входити до воды. Ґміна хоче розвязати проблем і будує при берегу два басены. Інвестиция має быти завершена іщы в тым році. Самоуряд плянувал одмулити залив, єднак спротивили ся тому еколоґы з Варшавы і справа єст актуально ведена на судовій дорозі.