Сумар дня на 21. марця 2025 р.

Приносиме вам сумар медияльной ґрупы ЛЕМ.фм+ на ден 21. марця 2025 р.

Одбыла ся весняна сесия Св. Собору Єпископів ПАПЦ

В віторок 18. марця в Варшаві під ведіньом Православного Митрополиты Варшавского і цілой Польщы Савы одбыла ся весняна сесия Св. Собору Єпископів Польской Автокефальной Православной Церкви, в якій взяли участ вшыткы єпископы. Як подано в комунікаті, бесідувано о зовнішніх і внутрішніх справах. Собор піднял рішыня выголосити новых святых. Канонізацийны торжества Катыньскых Мучеників будут проходити 17. вересня/септембра тр. Порушено і тему розпоряджыня Міністра Едукациі о ограничыню вчыня реліґіі в школах. Признаны были і пасхальны нагороды. Правом ношыня палиці был одзначеный м.ін. лемківскій священник о. Ярослав Ґрич. Окрем того вызначены были загальномирополитарны колекты, з чого дві сут на лемківскы храмы. В липци/юлию колекта буде на будову церкви на Св. Горі Явір, а в серпни/авґусті на будову церкви в Ґладышові.

Інформация Заступці Омбудсмана на тему скарг і внесків тыкаючых меншын

6. марця 2025 рока Заступця Омбудсмана Адам Кшывонь представил соймовій Комісиі Нацийональных і Етнічных Меншын інформацию на тему скарг і внесків, якы тыкали меншын в роках 2023-2024. Подля статистичной інформациі о зголошынях, котры выстосувано до Омбудсмана, в тым періоді вплынуло 45 новых внесків, котры тыкали охороны прав нацийональных і етнічных меншын, а 228 зголошынь тыкало примірів дискримінациі, нерівного трактуваня, насильства і языка ненависти з огляду на нацийональніст, расу або етнічне походжыня – векшына з них тыкала чужинців, а некотры польскых громадян, будучых членами меншын. Обшырный фраґмент выступліня Заступця Омбудсмана посвятил ситуациі ромской меншыны. Окрем того порушена была квестия права до едукациі, як і проблем переступств мотивуваных ненавистю. Дрібниці чытайте на нашым портали.

«Руска Бурса» печатат обшырну публикацию про лаґєр в Талергофі

В минулым році, в рамках лемківскых упамятнінь 110. річниці інтернуваня Русинів одбыла ся наукова конференция пн. «Талергоф. Першый лаґєр інтернуваня в Европі». Веце на тоту тему дознате ся з сайту talerhof.lem.fm, де мож скорыстати м.ін. з інтерактивной мапы. Як поінформувало Стоваришыня «Руска Бурса» в Ґорлицях, в тым році плянуют печатати шыршу публикацию, в котрій найдут ся м.ін. николи перше не публикуваны материялы з акт Центрального Талергофского Комітету во Львові, котры нашли ся в архіві Руской Бурсы (то близко 6 тис. документів). Будеме іщы о тым інформувати.

О Лемках бесідувано на реколекциях в Римі

Вчера в Римі в рамках Римскых Домініканьскых Реколекций участникы могли почути о лемківскій меншыні. Тo 9. римскы реколекциі, орґанізуваны домініканцьом о. Томашом Достатнім. В іх рамках через штырі дни проходят выклады тыкаючы католицкой віры, екуменізму, але і польской еміґрациі ци красной літературы. Вчерашня стріча прошла в Базилиці Сан Бартоломео алл’Ісоля Тіберіна, санктуариі мучеників ХХ столітя. О православным святым, замордуваным в Аушвіц свщенномученику Григорию Перадзе оповіл о. Павел Стефановскій, парох православной парохіі в Щеціні. Пак в катакумбах базиликы одбыла ся дальша стріча о Лемках, котру вели Ольга Васєнко-Стефановска і о. Павел Стефановскій.