Сумар дня на 21. марця 2024 р.

Приносиме вам сумар медияльной ґрупы ЛЕМ.фм+ на ден 21. марця 2024 р.

О Рускій Народній Республиці Лемків в Йонкрес

Як інформувал еміґрацийный діяч Андрий Медвід, 10. марця в американьскым Йонкерс одбыла ся стріча посвячена істориі о Рускій Народній Республиці Лемків. Доповід выголосил наш історик, др Богдан Горбаль. Презентация была по анґлицкы, кєд же більшіст присутных комунікує уж лем в тым языку. В стрічы взяли участ і молоды люде, што так само тішыт.

Пряшівска авторска стріча з Петром Медвідьом

В віторок, 19. марця в просторах Музею Русиньской Культуры в Пряшові одбыла ся стріча, на котрій презентувана была збірка поезиі «синьов країнов» Петра Медвідя. Подія проходила в рамках 2. річника Русиньского Книжного Фестівалю. Єй учасниткы могли познати творчіст сучасного русиньского творці, а при тым запрезентуваны были русиньскы книжкы. Презентували ся і лемківскы выданя, котры явили ся в остатнім часі. Присутна на подіі была ведуча Стоваришыня «Руска Бурса» в Ґорлицях, Наталия Малецка-Новак. Збірка «синьов країнов» была выдана влони як раз ґорлицком Руском Бурсом. Подібна авторска стріча з Петром Медвідьом проходила в минулу неділю в Ґорлицях, а вюл єй Петро Мурянка.

Засідала Рада Єрархів Грекокатолицкой Церкви на Словациі

В віторок, 19. марця 2024 р. одбыло ся в Архієпархіяльным Уряді в Пряшові 35. пленарне засіданя Рады Єрархів Грекокатолицкой Церкви на Словациі. Рада єрархів зышла першый раз од більше як двох років. Найвысшый орґан митрополитарной церкви sui iuris (свого права) перервал свою роботу по тым, што 25. квітня/апріля 2022 р. року папа Франциск принял зречыня уряду од владыкы Йоана Бабяка. Рада тепер могла обновити свою діяніст, кєд же од 27. січня/януара новым митрополитом остал Йона Максим. Участ взяли вшыткы члены Рады – владыкы грекокатолицкой церкви на Словациі. Владыка Мілян Лах остал новым секретарьом Рады єрархів. Вчас робочого проґраму владыкы занимали ся праздником Пасхы і прияли спільный проґрам празднуваня в окремых катедральных соборах в Пряшові, Кошыцях і Братиславі. Єдночасно Рада схвалила Управы про служыня Святой літургіі в пряшівскій, кошыцкій і братиславскій єпархіях. В рамках засіданя были єпископи інформуваны і о роботі над новыма підручниками для школярів. Рішено, што наступне засіданя одбуде ся в Братиславі.

Польковицка школа з новым прапором

Як інформує ґміна і місто Польковиці, основна школа номер 4 в Польвковицях ім. Мариі Склодовской-Кюрі отримала новый прапор. Школа діє од 2017 р., через розлучыня од ґімназиі номер 2. Початково вчас офіцияльных подій основна школа выступувала не зо своім прапором. Аж тепер школа придбала свій, котрый буде выставлювала на ріжного рода подіях. Вчас акциі наданя прапору участ взяли м.ін. власти Польковиц і радны. Бургомайстер Лукаш Пузнєцкій звернул увагу, што шкільный прапор символизує даякы вартости.