Сумар дня на 21. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 21. лютого/фебруара 2025 р.

Зміны термінів складаня внесків о занятя для учеників нацийональных і етнічных меншын

Міністерство Едукациі запропонувало зміну термінів складаня внесків і освідчынь в справі орґанізациі занять для учеників нацийональных і етнічных меншын. Публична школа має обовязок запевнити факультативну едукацийну оферту. На стороні Урядового Центру Леґісляциі явил ся проєкт розпоряджыня зміняючого розпоряджыня в справі условій і способу реализациі предшколями, школами і публичныма пляцівками задач уможливяючых підтримуваня почутя нацийональной, етнічной і языковой достоменности учеників належачых до нацийональных і етнічных меншын і соспільности хоснуючой реґіональный язык. Проєктовы зміны мают зуніфікувати i зоптимализувати рыхтуваня орґанізациі шкільного рока. Актуально внесок о обнятя вчыньом меншынового языка складат ся в вересни/септембрі, значыт уж по початку шкільного рока. В пропонуваній новелизациі термін тот мал бы быти зміненый на 31. марця, шкільного рока попереджаючого шкільный рік, котрого орґанізация занять має тыкати. В припадку діти приниманых до школы/предшколя внесок треба бы было зложыти до 31. липця/юлия, перед початком шкільного рока. Розпоряджыня мало бы обовязувати од 30 квітня/апріля тр., при чым в тым році мал бы іщы обовязувати перехідный період, де кінцевым терміном зложыня внеску для вшыткых учеників буде 31. липця/юлия.

17 мілийонів евро для Ґорлицкой Функцийональной Обшыри

Понад 72 млн злотых засилит інвестицийны буджеты трьох самоурядів діючых в рамках Ґорлицкой Функцийональной Обшыри: міста Ґорлиці, гміны Ґорлиці і ґміны Санкова. Стоваришыня Ґорлицка Функцийональна Обшыр было основане в 2021 р. Обшыр обнимат понад 320 кубиків і жыє на ній близко 50 тис. люди. В Кракові представникы стоваришынь одповідаючых за реализацию територияльных стратеґій в Малопольщы одобрали з рук Малопольского Воєвідства територияльны порозумліня. Разом забезпечено понад 380 млн евро, т.є. понад 1,5 млн злотых на понад 470 проєктів в цілым воєвідстві. Середкы будут схоснуваны на інвестициі з обшыри м.ін. енерґетичной ефективности, розвитку однавяльных джерел енерґіі, господарувяня одпадами, містного транспорту, социйяльной і едукацийной інфраструктуры, інфраструктуры охороны здоровля, вспертя едукациі і дальшых. В рамках дофінансуваня самоуряды Ґорлицкой Функцийональной Обшыри хотят примірно дополнити пішо-роверовы стежкы з Санковой до Вапенного і Рыхвалду, як і побудувати стежку меже Санковом і Домініковицями.

Ґміна Хоцянів буде сканализувана

В ґміні Хоцянів реализує ся барз важна для жытелів інвестиция. Уж неодолга рушат першы працы звязаны з комплексовом будовом канализациі на обшыри ґмінной аґломерациі. Догваріня на реализацию той інвестициі підписал в тым тыжни бургомайстер Томаш Кульчыньскій. Хоцкы тяжко в тото увірити, ґміна Хоцянів не єст взаглі сканализувана. За бургомайстром Хоцянова, процес сканализуваня ґмінной аґломерациі єст зложеный і тяжкій. Зачал ся в 2020 р. позысканьом мілийона злотых на сам проєкт задачы. Канализацию побудуют з Хоцянова аж по кінці ґміны. Вартіст інвестициі сігат 53 млн злотых. Ґміна позыскала на тото дофінансуваня на рівни 75 процентів. Задача має быти завершена в 2027 р.