Сумар дня на 21. лютого/фебруара 2020 р.

Приносиме вам сумар медияльной ґрупы ЛЕМ.фм+ на ден 21. лютого/фебруара 2020 р.

Конференция про леґіслативны моделі охороны меншын

В віторок, 18. лютого/фебруара, в Братиславі проходила медженародна конференция під назом «Леґіслятивны моделі охороны прав нацийональных меншын». Зорґанізувал ю Уряд Полномічного Влады Словацкой Республикы про Нацийональны Меншыны. На конференциі рішали, ци Словация потрібує комплексовый меншыновый закон, котрого держава дотепер не має. В Польщы окремый закон про меншыны істнує од 6. січня/януара 2005 рока, його полна назва то Устава про нацийональны і етнічны меншыны та про реґіональный язык. Полномічный Ласло Буковскій припомнул на конференциі, што сучасна словацка леґістлятива, котра тыкат ся охороны прав нацийональных меншын, є поділена і непереглядна. Конференция поділена была на три панелі. В рамках першого бесідували о подобі закону на забезпечыня полного уплатніня прав нацийональных меншын на Словациі. В дальшым панелі участникы презентували моделі охороны прав меншын в інчых державах: на Мадярах, в Чешскій Республиці, Войводині, як і в Республиці Сербскій, котра є частю Босні і Герцеґовины. Остатній панель приближал погляд окремых нацийональности на домашні обставины, голос мали тіж представникы меншын. За русиньску меншыну бесідувал правник Мартін Дуфала, котрый так само брал участ при творіню леґіслятивного заміру меншынового закону.

Дофінансуваня на едукацию

Ґміні Санкова, довєдна з проєктовым партнером – Стоваришню Нова Перспектива з Біча, признали дофінансуваня 1 млн 300 тис. зл, головні на едукацию. Грошы походят з Реґіонального Операцийного Проґраму Малопольского Воєвідства на рокы 2014-2020. В віторок, 18. лютого/фебруара, в Маршалківскым Уряді Малопольского Воєвідства кєрівник Ґмінного Осередка Социяльной Помочы – Міхал Дідух, одобрал в імени Війт Ґміны Санкова промесу на реалізацию проєкту. В його рамках орґанізуваны будут формы професийного розвитку для учытелів – школіня та подипломовы студиі. Ученикы отримают підпору в формі дидактично-вырівнуючых занят з математикы, фізикы, хіміі і анґлицкого языка, а тіж з обшыри основных компетенций, як лоґічне думаня, розвиваня креативности, певніст себе, знаня спілпрацувати і ін. В проєкті передвиджено грошы і на тото, жебы комплексово допосажыти шкільны працовні до вчыня выміненых предметів та купити підручникы і розмаіты дидактичны материялы.

Маґурич доціненый омбудсманом Боднаром

О тыжден, в четвер, 27. лютого/фебруара, польскій Омбудсман Адам Боднар вручыт почестну одзнаку за Заслугы для Охороны Прав Чловека Шымонови Моджеєвскому – spiritus movens Стоваришыня Маґурич. Шымон Моджеєвскій то особа, котра ціле своє професийне жытя присвятила на ремонтуваня нагробных памятників і крестів. Єст основательом і ведучым од початку істнуваня Стоваришыня Маґурич, соспільной орґанізациі, котра протягом парудесятьох років свойой діяльности выремонтувала близко 2900 обєктів камінной сепульклярной штукы. Завдякы Маґуричови сохранено перед знищыньом, а через тото загыбаньом, десяткы лемківскых цмонтерів і соткы крестів та нагробків на Лемковині, котры в наступных роках можут свідчыти о жыючій в даных місцях лемківскій спільноті. Обшыр діянь Маґурича то не лем Лемковина, а ціла полудньово-східня Польща, аж і Украіна і інчы державы. Ремонтуваны сут цмонтері і нагробкы без огляду на конфесию похороненых осіб. Шымон Моджеєвскій был стипендистом Міністра Культуры і Нацийональной Спадковины. В 2011 році отримал в Амстердамі Grand Prix Europa Nostra в катеґориі: охорона культуровой спадковины.

«Лося в моім малярстві»

Уж заран в Мазярскій Загороді в Лоси пройде вернісаж выставы пн. «Лося в моім малярстві». Своі творы презентувала буде Гелена Янусь, яка од 10 років мешкат на Лемковині. Артистка занимат ся шталюґовым малярством в олійній техніці. Малює тіж акварелями і пастельом. Інспірацийом для творчости є природа і архітектура Низкого Бескіду і Розточа, де Гелена Янусь ся вродила і выховала. До той поры взяла она участ в більше як 60 колективных і 17 індивідуальных выставах. Єст членкыньом Клюбу Штукы при Ґалериі Дворы Карвациянів і Ґладышів в Ґорлицях. Выставу «Лося в моім малярстві» в Мазярскій Загороді буде мож обзерати до 22. марця.