Сумар дня на 21. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 21. квітня/апріля 2022 р.

В Білянці знищыли польско-лемківску таблицю

В Білянці зас замалювали двоязычну (польско-лемківску) таблицю з назвом села. На тот момент тяжко повісти, коли ся тото стало, але правдоподібно вночы з остатньой неділі на понедільок. Напевно была знищена таблиця од страны Шымбарку. Незідентифікуваны справці замалювали лем лемківскоязычну назву «Білянка», а польска част «Bielanka» є нерушена. Маме надію, же справом займут ся не лем державны інституциі, але предовшыткым орґаны, якы мают за задачу найти, обвинити і покарати справців.

Лемківскы упамятніня 75. річниці Акциі «Вісла»

В суботу, 30. квітня/апріля, одбудут ся споминовы подіі в 75. річницю Акциі «Вісла». Хотячы упамятнити тоты подіі, зыйдеме ся в місцях, якы не лем символично – але і фактично – засвідчуют про траґедию нашых дідів, родичів і дальшых поколінь Лемків. Першым пунктом в проґрамі буде одданя чести жертвам лаґру працы в Явожні при лемківскым місци памяти. Подіі в Явожні заплянувано на 11.00 год. Великодня молитва за вшыткы жертвы выгнаня вызвучыт в церкви св. Михала в неістнуючым по выселінях селі Білична о 14.00 год. Пак зобраны переіхают до Устя Руского, де о 15.00 год. під памятником в центрі села зложене буде квітя. Посліднім пунктом буде стріча, яка зачне ся о 17.00 год. в просторах ґорлицкой Руской Бурсы. До спільнотовых упамятнінь кличут вєдно Стоваришыня Лемків і Стоваришыня «Руска Бурса» в Ґорлицях.

Річниця основаня Гуменьского Архієпархіяльного Вікарияту.

В Світлый Понедільок (за новым стильом), 18. квітня/апріля, в грекокатолицкым Храмі Успіня Пресвятой Богородиці в Гуменным одслужена была торжественна літургія з нагоды 5. річниці основаня Гуменьского Архієпархіяльного Вікарияту. На святкуваню річниці гуменьскій вікарий о. Мартін Злацкій привитал пряшівского архієпископа і митрополиту Йоана Бабяка. Гуменьскій Архієпархіяльный Вікарият зрядил пряшівскій владыка на Великій Четвер 13. квітня/апріля 2017 р. Вікарият є на териториі семох деканатів і має 76 парохій. Русиньскы активісты, головно з Общества Св. Йоана Крестителя, долгы рокы жадают Пряшівску Архієпархію о єпископа, котрый мал бы душпастырювати Русинам. На тоты просьбы дотепер не пришла позитивна одповід. Наопак, основаньом вікарияту в Гуменным ся реально поділила територия, котра є населена Русинами.

Посвятят одновленый русиньскій будинок в Будапешті

В пятницю, 29. квітня/апріля, одбуде ся в Будапешті святочна подія. По реконструкциі буде торжественно посвяченый одновленый будинок Вседержавного Русиньского Самосправуваня. Обновлену сідибу посвятит грекокатолицкій священник Михаіл Тіводор. Подія буде повязана з презентацийом найновшых русиньскых выдань, якы были публикуваны на Мадярах. Выданя Вседержавного Русиньского Самосправуваня одпрезентує Михаіл Капраль, ведучый Русиньского Наукового Інституту ім. академіка Антония Годинкы. Як раз Михаіл Капраль недавно выдал дві про розвиток русиньского языка важны публикациі. Выданя, котры сут повязаны з Ференцом ІІ Ракоцийом, запрезентує Янош Кожняньскій. Буде і культурный проґрам. Подія зачынат ся о 12.00 год.