Сумар дня на 21. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 21. грудня/децембра 2020 р.

Черогвы ограничыня

В четвер, 17. грудня/децембра, польскій міністер здоровля Адам Нєдзєльскій поінформувал о введіню од 28. грудня/децембра до 17. січня/януара вседержавной кварантанны і новых ограничынь. Є то подля міністра єдиный спосіб, жебы стримати третю фалю захворінь на Covid-19. Од 28. грудня/децембра закрыты будут готелі – тіж на службовый рух. Одкрыты будут лем для мундуровых служб, медиків, пациєнтів специялистичных шпыталів і осередків Центрального Осередка Спорту, одкрыты будут і працівничы готелі. В звязку з новыма рестрикциями не будут діяти і лыжны стациі, якы будут одкрыты лем в рамках професийного спорту. Зас будут закрыты і гандльовы центры, окрем склепів з ідлом, книжками і пресом, дроґерий і аптык. Особы, якы придут в тым часі до Польщы зорґанізуваным транспортом, будут обняты 10-дньовом кварантанном. Міністер здоровля заповіл тіж, што в ночы з 31. грудня/децембра на 1. січня/януара буде обовязувал заказ переміщаня ся з вынятком м.ін. на выконуваня необхідных службовых справ.

Без устного на матурі з меншынового языка

Важны зміны для учеників. Як результат пандеміі коронавіруса і вчыня в домашній інтернетовій формі, змінены сут еґзамінацийны вымаганя в еґзамінах: осмоклясника і матуральным в 2021 р. Оба еґзаміны будут в будучым році вынятково проведены на основі розпоряжыня підписаного 16. грудня/децембра 2020 р. Міністром Едукациі і Наукы Пжемыславом Чарнеком. Матуральный еґзамін, подібні як в 2020 році, буде проведеный лем в писемній части. Не буде обовязкова устна част матуры з польского языка, меншынового языка і чужого новожытнього языка. До устного еґзаміну будут мочы приступити абсольвенты, котрым його результаты сут потрібны в рекрутацийным процесі до заграничной высшой школы. Ученикы не будут тіж мусіти приступувати до еґзаміну з єдного додаткового предмету на розшыреным рівни. Змінены сут і еґзамінацийны вымаганя для поєдных предметів. О вшыткых змінах можете прочытати в розпоряджыню, якє найдете на офіцияльных державных сайтах.

В ЕП приняли резулюцию підпераючу ініциятиву Minority SafePack

Значыча більшіст в Европейскым Парляменті приняла в минулый четвер, 17. грудня/децембра т.р. резолюцию підпераючу ініциятиву Minority SafePack, яка тыкат того, як законы Европейской Уніі могли бы промувати права меншын, як тіж языкову і культурову ріжнорідніст в Европі. 524 голосы были за, 67 проти, 103 особы стримали ся од голосуваня. Згідно з резолюцийом, Европейскій Парлямент вказує пiдпору для ініциятивы Minority SafePack і призыват Европейску Комісию до діяня і пропозициі правных актів до 15. січня/януара 2021 р. Minority SafePack то перша европейска громадяньска ініциятива, яка мала пленарну дебату і єй резолюция была принята Европейскым Парляментом.

Ґондольова желізниця в Мушыні?

23 рокы тому, в вересни/септембрі 1997 рока, одбыло ся торжественне одкрытя Ґондольового Вытягу на Креницку Яворину. Будувано єй вісем місяців. Думкодавцьом інвестициі был товдышній бургомайстер Крениці. Єст шанса, што близко чверт столітя по тым тот сам чловек, Ян Ґольба, актуальный бургомайстер недалекой Мушыны, зреализує близнячый проєкт будовы видоковой желізниці на гору Мальник і вежы на верху Мальника. Як інформує Ян Ґольба, кєд жытелі позитивно ся выповідят о будові, власти зачнут діяня цілю придбати унійны середкы на реализацию пляну. Верх Мальника находит ся на высокости 726 метрів над рівньом моря. Мож з него обзерати Любовняньску Верховину, Пусту Велику і Креницку Яворину, Татры, пасмо Радієвой і Малы Пєніны.