Сумар дня на 20. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 20. вересня/септембра 2022 р.

Наступный крок в страну одкрытя басену в Высовій

До 3. жолтня/октобра самоуряд в Ґміні Устя Рускє жде на заінтересуваны фірмы, котры займут ся розбудовом і модернізацийом басену в Высовій. Од долшого часу в ґміні вертат тема ремонту водного парку в Высовій, котрый од 2019 р. єст закрытый зо взгляду на недодтаткы в конструкциі. В червци/юнію тр. Повітовый Інспекторат Будовляного Надзору выдал рішыня, в котрым вызначыл ґміні час до 30. листопада/новембра 2023 р. на усуніня вшыткых недостатків при водным парку. Задачом выконавці буде направа конструкцийных і неконструкцийных елементів. Іде м.ін. о зміцніня конструкциі, выміну части даху, поставліня новых стін ци дотепліня в дакотрых місцях будинку, а што за тым іде достосуваня системів вентиляциі і огріваня. В опініі інспекторату час даный на ремонт басену єст дост долгій, хоц як сам подал – направчы роботы будут скомпликуваны. На тоту хвилю не знатя, кілько ґміну вынесе приверніня парку до хоснуваня. Як передал війт ґміны Збіґнєв Людвін, ґміна отримала дофінансуваня з Проґраму «Польскій Лад» в высокости 3,5 млн зл, а скорше іщы 1,6 млн зл з проґраму підпоры ґмін з гірскых обшыри.

Більшы грошы на будову Амфітеатру в Креници

Бургомайстер Крениці Пьотр Рыба поінформувал на своім фейсбуковым профіли, што в четвер, 15. вересня/септембра, Містна Рада підняла схваліня в справі зміны Вельолітньой Фінансовой Проґнозы для Ґміны Крениця. Зміна тыкат піднесіня пулі грошів на будову єдной з найбарже жданых креницкых інвестиций – амфітеатру. Обєкт має мати задашену сцену з простором 100 квадратных метрів і тисяч сідячых місц для публикы. Амфітеатр побудуют пониже нижньой стациі леніі на Паркову Гору, при ул. Никыфора Креницкого. В заміріню буде то постійне місце, де будут орґанізувати вшыткы культурны подіі в терміні од мая до жолтня/октобра. Більшу част коштів інвестициі покрыє дофінансуваня з Проґраму «Польскій Лад». Схваліня дає можливіст підписати догваріня з выконавцьом цілой інвестициі. Згідні з гармоноґрамом будовляны роботы зачнут ся іщы того рока, а закінчат в маю 2024 р.

Анкєта для мешканців Польковиц в справі нового желізницьового получыня

Дальшы досліджыня при розбудові желізницьового получыня Ліґниця-Любін-Польковиці-Ґлоґів. Як сме інформували, фірма INFRA вела консультацийны стрічы і анкєты направлены на жытелів заанґажуваных в проєкт ґмін. Єдном з такых ґмін єст ґміна Польковиці, котра рішыла провести додаткову анкєту специяльні для жытелів свойой ґміны. Як підкрислил бургомайстер Польковиц Лукаш Пузнєцкій, час досліджынь єст барз важный для проєкту і цілого самоуряду, рішыт бо о тым, як ішла буде нова ленія, а што за тым іде – як в будучым буде ся розвивало місто. З той причыны самоуряд вышол з ініциятивом власной анкєты для мешканців Польковиц. Єй результаты будут арґументом при выборі найліпшого вариянту новой леніі. Анкєта находит ся м.ін. на сайті ґміны Польковиці, выполнити ю можна до 29. вересня/септембра.

«Кухня Бойків і Лемків»

Фонд Реґіональный Інститут просит на наступне «Карпатскє слуховиско». Друга стріча пройде пн. «Кухня Бойків і Лемків» і вюл єй буде Кжыштоф Зєліньскій. Прелекция одбуде ся 22. вересня/септембра в інтернетовій формі о 17.00 год. Мотузок до стрічы находит ся на фейсбуковым сайті Карпатского Народного Університету.