Сумар дня на 20. січня/януара 2021 р.

Приносиме вам сумар медияльной ґрупы ЛЕМ.фм+ на ден 20. січня/януара 2021 р.

Державный Секретар дс. реліґійных і нацийональных звязків Канцеляриі Премєра Мадяр стрічат ся з меншынами

В грудни/децембрі минулого рока Міклош Шолтес, державный секретар дс. реліґійных і нацийональных звязків Канцеляриі Премєра Мадяр, зачал цикль стріч з представниками нацийональных меншын, жыючых в тій державі. 8. січня/януара секретар Шолтес продолжал зачаты стрічы. Найперше стрітил ся з представниками польской меншыны – Евом Марийом Ронаіни Слабов, посланкыньом Поляків в мадярскым парляменті, та з Марийом Фелфйолді, представничком Вседержавного Польского Самосправуваня, з котрыма бесідували про розвиток польской нацийональной меншыны в 2021 р. Пак Міклош Шолтес виділ ся з Віром Ґіріц, народном посланкыньом Русинів в парляменті, і з Віктором Крамаренком, председом Вседержавного Русиньского Самосправуваня. Державный секретар подякувал за поміч в реализациі будовы грекокатолицкой церкви в Дебрецині та выразил надію, што довєдна будут брати участ в русиньскым кєрмешы в вересни/септембрі тр. в Шайовпальфолі. Інформацию о стрічах секретар передал на своім офіцийным профіли на сайті Facebook. Закінчыл єй словами, штобы Господ Бог благословил вшыткых жыючых на Мадярах Поляків і Русинів.

Малопольща з 1,5 млд евро на рокы 2017-2020

Веце як 1,5 млд евро запропонувано для Малопольщы в рамках новой фінансовой перспективы 2021-2027. Дрібницьовы інформациі про пляны інвестуваня фондів з Евросоюзу в реґіоні являт ся 26. січня/януара, вчас консультаций Догваріня Партнерства. Зголошываня уваг до документу буде можливе до 22. лютого/фебруара. Віцемаршалок Малопольского Воєвідства Лукаш Смулка повіл, што буджет, котрый трафит до реґіону, буде заміненый на інвестициі – на розвиток малопольского бізнесу, службы здоровля, енерґетикы і транспорту. Закладат, што першы конкурсы могли бы рушыти уж в ІІ чвертці 2022 рока. Догваріня Партнерства окрислят ціли і спосіб інвестуваня унійных фондів з політикы спійности на найблизшы рокы. Разом з середками з Фонду для Справедливой Трансформациі Польща буде мала до роздиспонуваня коло 76 млд евро. В новій перспективі коло 60% фондів трафит до проґрамів реализуваных на державным рівни, дальшых 40% отримают реґіональны проґрамы, заряджаны маршалками воєвідств.

Поміч жертвам пожару в Шымбарку

По траґічным в наслідстві пожарі деревяной хыжы в Шымбарку коло Ґорлиц, в котрым згынула 15-літня дівчына, ціла хыжа згоріла, а три особы з симптомами затрутя чадом трафили до шпыталя, пожарникы черговый раз припоминают о забезпечаню своіх хыж і замонтуваню сенсорів дыму ци монооксиду угля. Додают, што вартат мати дома гасницю. Кошт цілого ґратя є невеликій, а може значучо звекшыти нашу безпеку. Пресовый офіцер ґорлицкых пожарників Дариюш Сурмач додає, што нарядя може нас заалярмувати о загорозі, звуковый сиґнал єст в силі нас збудити. Єдном з причын траґічного пожару в Шымбарку могла быти авария системы огріваня. Тырват соспільна колекта грошы на поміч родині реализувана через Комітет Помочы Жертвам Пожару покликана жытелями Шымбарку, Основном Школом, Охотничом Протиогньовом Стражом та Парохійом в Шымбарку.

Ци того рока явит ся дакє выріжніня для книжкы про Лемків?

Зачала ся IХ едиция конкурсу о Нагороду імени священника проф. Болеслава Кумора, орґанізуваного Соспільно-Культурным Товариством «Сандеччан» при підпорі порталю і місячника «Сандеччан». Зголошыня приниманы сут до 6. лютого/фебруара 2021 рока в двох катеґориях: книжка о Сандеччыні та сандецкій автор. Цілю конкурсу єст пошырювати ріжного рода книжкы выданы в 2020 році, якы звязаны з Сандеччыном, та промувати і нагороджувати авторів родженых або прожываючых на обшыри Сандеччыны. На лавреатів обох катеґорий і выріжненого, котрый выграт в голосуваню чытачів, ждут фінансовы нагороды і памятковы статуі. Оголошыня результатів пройде 27. лютого/фебруара. Каждого рока серед номінуваных до нагороды выдавництв находят ся і тоты звязаны з лемківском темом.

Фот. halogorlice.info