Сумар дня на 20. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 20. серпня/авґуста 2020 р.

Выстава в Коросні прямо з Меджелабірців

Од заране в Бюрі Артистичных Выстав в Коросні буде мож видіти роботы Енді Варголя. Презентуваны експонаты походят зо збіркы Музею Модерного Кумшту Енді Варголя в Меджелабірцях. Выстава має наголовок «Жытя і смерт Енді Варголя». Оповідат она о ріжных періодах з жытя артисты, од народжыня, жытя, часу, коли был найбільшом звіздом, по смерт. В сумі представленых буде 91 експонатів. Выстава має приближыти походжыня, етнос і характер Енді Варголя, котрого родиче походили з русиньской Миковы. Вернісаж выставы уж заран. На офіцияльну част, котра буде од 18.00 до 19.00 год., мают вступ лем особы з запрошынями. Пак выстава буде одкрыта про вшыткых. Вечернє дармове звиджаня експозициі буде тырвало до 22.00 год. В рамках подіі заплянувано тіж проєкцию фільмів Енді Варголя, котры будут презентуваны на мурах будинку.

Словацкє шкільництво рыхтує ся на нове

Міністерство Шкільництва, Наукы, Досліджаня і Спорту Словацкой Республикы хоче дефініювати термін «нацийональне шкільництво». Як подає Моніка Філіпова, державна секретарка того ресорту, роботы в тій справі сут уж ведены. Як додала, перше пляном міністерства было приняти окремый закон про нацийональне шкільництво, але з огляду на єднотну леґіслятиву думают над тым, жебы до тзв. шкільного закону ввести лем окрему част, де буде здефініюване «нацийональне шкільництво». Ресорт рыхтувану зміну хотіл бы досягнути до кінця тр. Подля міністерства, ціль така, жебы створити єднозначну дефініцию, што значыт «нацийональне шкільництво» на Словациі, і в чым ріжнит ся од словацкых шкіл, наприклад коли бесідує ся о школі з навчальным языком нацийональной меншыны. На Словациі є коло 700 інституций, де ся вчыт в мадярскым языку. Дві школы сут з русиньскым навчальным языком, в парох дальшых є навчаня русиньского языка. Істнуют і украіньскы, німецкы та ромскы школы.

Інновиця в вересни

Одбуде ся тогорічна едиция Інновиці. ХІІІ Театральны Стрічы Інновиця 2020 одбудут ся в днях 4.-5. вересня/септембра в Новици. З огляду на пандемічну ситуацию орґанізаторы скоротили тогорічный проґрам до двох дни. До той поры Інновиця все проходила в вакацийных місяцях рока. Окрем выступів театральных ґруп одбывати ся будут товаришучы акциі, такы як варштаты ремесла, выставы ци наука вырабляня лжыц. Театральны Стрічы в Новици то подія направлена предовшыткым на любителів альтернативных театральных інспіраций, котра што рік запрашат до інтересуючого і наштоден нестрічаного світа. Візия модерного театру, яку пропонує Інновиця, то м.ін. пєсы, варштаты і концерты, котры, інакше як в примірі традицийного театру, не сут презентуваны на театральных сценах, а головно в новичаньскій школі, пленері ци просто в поєдных лемківскых хыжах.

Ясло і Свидник довєдна

Проєкт під назвом «Обявлена культурна і природна дідовизна повіту Ясло і міста Свидник» хоче здобыти фінансы з середків Европейского Фонду Реґіонального Розвитку в рамках проґраму Interreg V-A Польща-Словация 2014-2020. В рамках мікропроєкту думкодавці хотят в обох містах побудувати інфраструктуру черезграничных туристичных стежок і орґанізувати выступліня фольклорных ансамблів в обидвох партнерскых містах. Реалізация є плянувана од марця 2021 р. до лютого/фебруара 2022 р. Цілковитый кошт інвестициі то 70 тис. евро, з того 50 тис. хотят жадателі проєкту фінансувати з европейскых фондів. Оба міста підписали в тій справі догваріня початком серпня/авґуста тр.