Сумар дня на 20. марця 2025 р.

Приносиме вам сумар медияльной ґрупы ЛЕМ.фм+ на ден 20. марця 2025 р.

61. Науковый семінар карпаторусиністикы

Інститут Русиньского Языка і Культуры Пряшівского Університету на віторок 25. марця 2025 р. приготовил 61. науковый семінар карпаторусиністикы. Тым разом на семінарі зо своім рефератом выступувала буде Ірена Боґочова з Катедры Славістикы Філософічного Факультету Остравского Університету в Чешскій Республиці. Реферуюча выступит з доповідю під назвом «Сітуація польской меншыны на Тєшіньску в ЧР (едукачны і общественны інштітуції, языкова політіка, леґіслатіва, теорія і практіка локалной двоязычности)». Ірена Боґочова то чешска лінґвістка, славістка і університетска педаґожка. Проблематиком польской меншыны на Цєшыньскым Шлеску занимат ся уж роками. Традицийно по рефераті семінар буде продолжал з презентацийом найновшых выдань з карпаторусиністикы. 61. семінар зачне ся о 13.00 год і одбуде ся в просторах Інституту.

Премєра в Театрі Духновича в Пряшові

Театр Александра Духновича в Пряшові рыхтує на пятницю 21. марця премєру пєсы «Щастна выгра», котрой автором є Василій Сиґарєв. Нову пєсу на дощках русиньского професийонального театру од страны режысериі приготовил гостинні режысер Светозар Спрушаньскій, котрый в Пряшові уж зробил 12 інсценізаций. Центалныма героями єст супружество – Надежда і Борис. «Щастна выгра» є шаленом анализом того, ци є обычайный чоловік приготовленый быти щестливым. Споминаній парі подарит ся выграти велику суму в лотериі, але по тым щестю стрічат іх сама завист, приятелі іх огваряют, і так приятельства пропадают. Переклад на русиньскый язык зробил Валерий Купка. «Щастна выгра» єст в 79. сезоні театру за порядком 402. премєром.

Петиция в справі охороны Горы Явір

Фурт заохочаме Вас підписати петицию – протест в справі побудуваня на Святій Горі Явір видоковой вежы. Припоминаме, што окрем того обєкту, має гын быти зроблена і пленерова експозиция посвячена барскым конфедератам. Здає ся, же в демократичній державі голос соспільства повинен мати дакє значыня. З інформаций, якы дотерли до нашой редакциі, выходит, што одбыли ся уж консультациі. Любителі горы Явір апелют о пошануваня для культуровй спадковины того місця. Апелюют і о тото, штобы была дальше захована традиция і духовіст горы, без додатковых річы, якы на силу здают ся вводити дециденты. На сайті petycjeonline.com мож підписати петицию в тій справі. Мотузок до ней найдете і на нашым портали.

Одбыла ся загальнопольска православна олимпіяда

Як інформує православна парохія Св. Тройці в Любіні, з благословліня Митрополиты Варшавского і цілой Польщы Савы одбыла ся загальнопольска православна олимпіяда. Темом тогорічных змагань был «Великій піст як час духового одроджыня». Орґанізатором науковых змагань была Катедра Православной Теолоґіі Університету в Білымстоку. Одбыли ся три етапы. Першый етап проходил в ріжных місцях, в тым і в любіньскій парохіі. Серед фіналистів на подіюм станула Алина Разумовска, учениця І Ліцею ім. Миколая Коперніка в Любіні.