Сумар дня на 20. марця 2024 р.

Приносиме вам сумар медияльной ґрупы ЛЕМ.фм+ на ден 20. марця 2024 р.

В ґорлицкым повіті безпечні

Перед тыжньом в Повітовым Старостві в Ґорлицях прошло засіданя Комісиі Безпекы і Публичного Порядку та Повітового Ансамблю Кризового Заряджаня. Ведучом Комісиі Безпекы є староста Мария Ґубала. Комендант Повітовой Поліциі надкомісар Мариюш Пьотровскій передал інформацию о стані безпекы і публичного порядку в повіті та о діяльности Коменды в 2023 році. Рейоновый Прокуратор Тадеуш Цебо повіл о стані злочынности і о борбі з ньом в минулым році. Рапорты з діяльности передали дале Комендант Протиогньовой Стражы, Державный Повітовый Санітарный Інспектор, Повітовый Дохтор Ветеринариі та Повітовый Інспектор Будовляного Дозору. Ведуча Комісиі по анализі інформаций подала, што стан безпекы ґорлицкого повіту мож оцінити на добрый, і позитивно оцінила діяня служб. Староста подякувала вшыткым за оддану роботу і креуваня доброго образу публичных служб.

Ґміна Ропа поможе выремонтувати церков в Лоси

В пятницю 15. марця ґміна Ропа підписала догваріня на дофінансуваня консерваторскых робіт в забытковій грекокатолицкій церкви в Лоси. Реализувана задача то консервация олтаря разом зо золоченым табернакльом, котрый вымагат пильной консервациі. Опікуны церкви уж од долшого часу думали о модернізациі пізнобарокового олтаря, так штобы зас міг тішыти очы свойом красом, єднак кошты такой інвестициі міцно перекрачали буджет парохіі. З помочом вышла ґміна Ропа, котра на реализацию задачы отримала фінансове спертя з Урядового Проґраму Одбудовы Забытків. Плянуваный термін закінчыня консервациі то листопад/новембер 2024 рока.

Одбыл ся 34. Фестіваль Новой Русиньской Співанкы «Ружова Заградка» в Сербіі

В неділю 17. марця в Новым Саді на Великій Сцені Йован Дьордєвич Сербского Нацийонального Театру одбыл ся 34. Фестіваль Новой Русиньской Співанкы «Ружова Заградка». Спосеред 15 русиньскых композиций, публика за найліпшу выбрала співанку «Мир там тя чекат» – авторком тексту є Ася Папуґа, музику скомпонувал Александер Човс, зааранжувал Мирослав Пап, а пісню выконала Танита Ходак Планчак. Зас конкурсове 5-особове жырі за найліпшу выбрало пісню «Пятый бік світа» до слів Мирославы Даждиу і музикы Татяны Колєсар Ґвоіч. Аранжацию співанкы зробил Ервін Маліна, а заспівала Мирена Тимко. Фестіваль «Ружова Заградка» орґанізувало Радийо і Телевізия Войводины при підпертю русиньскых редакций радия і телевізиі і Музичной Редакциі Радия і Телевізиі Войводины. Нарогоду за найліпше выконаня здобыла Татяна Яшко, котра заспівала пісню Гвоздочка, котра заняла третє місце в оціні жырі. Другє місце подля жырі заняла пісня «Пятый бік світа», што была выбрана публиком за найліпшу. В рамках тогорічного фестівалю публика мала нагоду припомнути сой і послухати некотры з найкрасшых співанок, котры для фестівалю написал уж покійный Владислав Надьмитро і Михал Лікар, авторы, котрых творчіст влияла на вельо попередніх фестівалів.

Стріча з ініциятивы віцебургомастра Польковиц Кжыштофа Нестера

З ініциятивы віцебургомастра Польковиц Кжыштофа Нестера до Польковиц приде Лукаш Казек – журналиста і популяризатор істориі. В містно-ґмінній публичній бібліотеці уж заран пройде стріча з тым автором. Лукаш Казек єст автором історичных книжок, репортажів, фільмів і телевізийных проґрамів, м.ін. в телевізиі History Channel веде серияль Таємниці Нижнього Шлеска. Втрачены Скарбы Нижнього Шлеска. Сам єст нижньошлезаком. Бесідує о істориі реґіону та о людях, што пришли жыти на Нижній Шлеск по 1945 році. Стріча одбуде ся заран о 17.00 год в Авдийовізуальній Сали польковицкой бібліотекы.

Фот. eu-ropa.pl