Сумар дня на 20. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 20. лютого/фебруара 2025 р.

Стріча Нижньошлеской Воєводы з меншынами

В минулый понедільок в Нижньошлезскым Воєвідскым Уряді во Вроцлаві одбыла ся стріча представників нацийональных і етнічных меншын з Нижньошлезском Воєводом Анном Жабском, яка на тій функциі єст од листопада/новембра 2024 р. В стрічы взял участ репрезентант лемківской меншыны – ведучый Головного Заряду Стоваришыня Лемків, Анрдий Копча. Воєвода стрітила ся з меншынами, штобы побесідувати о потребах і плянах дальшой спілпрацы з урядом. В подіі брала участ новопокликана Полномічна Воєводы дс. меншын Марийоля Абкович, яка была ініцияторком стрічы. В сумі взяло в ній участ 30 представників ріжных нацийональных і етнічных меншын, якы прожывают на обшыри Нижнього Шлеска. В уряді во Вроцлаві доступна є тепер выстава з нагоды 20. річниці принятя меншынового закону, яку перше одкрыл в Соймі Маршалок Шымон Головня.

«Лемківскій Річник 2024»

Іщы раз рекомендуєме вашій увазі «Лемківскій Річник 2024», якій выдає Стоваришыня Лемків. В публикациі, яка посвячена є істориі Талергофу, прочытати мож м.ін. дописы до головной темы: Даміянa Новакa о істориі Центального Талергофского Комітету во Львові; редактора выданя, Северияна Косовского, о істориі посвячыня памятника в Чорным в 1934 р., якій был посвяченый памяти о. Максима Сандовича і вшыткых Талергофців. О істориі Талергофу пише тіж Богдан Копча, якій представлят картоґрафічны опрацуваня до темы. З інчых обшыри мож чытати допис Петра Трохановского о 40. річници выставы «Лемкы», яка одбыла ся в 1984 р. в Новым Санчы, ци спомины Андрия Копчы о тым, як 20 років тому нагрывано фільм «Акция Вісла», ч. 1. В части «Культура» опубликувано два розділы автобіоґрафійной повісти Ярослава Трохановского (першый розділ вказал ся в Річнику 2022). Севериян Косовскій представил тіж особу Амроза Ковача, кєд же в 2024 р. выполнило ся 100 років од його смерти. «Лемківскій Річник 2024» мож придбати по контакті зо Стоваришыньом Лемків, неодолга тіж буде в бібліотеці Руской Бурсы в Ґорлицях, але так само в даякых нашых парохіях на Лемковині і чужыні.

Комісия Ґорлицкого Повіту в Квятони

13. лютого/фебруара члены Комісиі Едукациі, Культуры, Спорту і Пропомоциі Ґорлицкого Повіту одвиділи єден з найціннійшых памятників архітектуры Малопольщы – церков св. Параскєвы в Кватони, яка находит ся на списку UNESCO. Вчас стрічы представникы Комісиі мали нагоду познати історию того лемківского храму. Припомнено, што під конец 2024 р. закінчыли ся працы звязаны з системом протиогньового забезпечыня святыні. В рамках тых робіт заінсталювано модерный систем FOG. На завершыня стрічы Ведуча Комісиі Галина Лась [Łaś] подякувала Мариі і Янови Гырам за іх штоденну опіку над храмом, гостинніст і інтересуюче представліня єй істориі.

В Токаіку посвячено одновленый грекокатолицкій храм

В неділю, 16. січня/фебруара русиньскє село Токаік на Пряшівщыні, філию парохіі Міньовці, візитувал Высокопреосвященный Йона Максим, пряшівскій грекокатолицкій архієпископ і митрополита. Владыка принял запрошыня посвятити одновленый храм і ківот. Храм святого пророка Ілиі был в 2023 р. значно пошкодженый по землетрясіню, якє прошло як раз в тій части Словациі. На початку праздника вшыткых привитала місцева старостка села і адміністратор парохіі о. Лука Кіреш. Перед Божеском Літургійом кыр Йона посвятил храм ззовни. Владыка выголосил і проповід в тот ден. Торжество закінчыло ся в місцевым культурным домі.