Сумар дня на 20. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 20. лютого/фебруара 2024 р.

Маґурскій Нацийональны Парк ограничыл плянувану в 2024 році вытинку

Початком лютого/фебруара дирекция Маґурского Нацийонального Парку поінформувала о ограничыню плянуваных в 2024 році вытинок. 8. лютого/фебруара в Едукацийно-Музейным Осередку в Крампній прошла інформацийна стріча дирекциі Парку з жытелями ґміны на тему ограничыня продажы дров для опаляня, што походит з Парку, зо взгляду на ограничыня вытинкы. Як підкрислил директор Парку, Норберт Кєц, унійна стратеґія біоріжнорідности ясно вказує, што до 2030 рока дирекция мусит обняти охороном 30% земельных обшыри, а стислом охороном 1/3 обшыри унійні хороненых. Директор признал, што в остатніх роках позыскувано барз дуже, особливо букового дерева – середньо 4,5 тис. м3 [кубометрів], а до кінця марця буде то 500 м3. Тепер пріоритетовом задачом Парку буде провести перегляд природничых сідлиск, бо лісовый операт был робленый 10 років тому. В стрічы учатс взяло понад 80 осіб, в тым війт ґміны Крампна, представныкы ґмінной рады та представникы надлісництва Ґорлиці і Дукля, котры мают запевнити альтернативу при закупі дерева для паліня.

«Чаро депозіт» нова выстава в Музею Русиньской Культуры

15. лютого/фебруара в Музею Русиньской Культуры в Пряшові прошол вернісаж выставы «Чаро депозіт». Находит ся она в реконструуваных просторах музею, в Выставовій сали Михала Дубая. Куратором выставы єст етноґраф Мирослав Морохович при спілпрацы з дальшом кураторком музею Анном Симковом. На выставі мож видіти передметы, з каджого реґіону пілнічно-східньой Словациі, де прожывают Русины. Презентувана експозиция приближат жытя Русинів в минулости, чым ся занимали, якє нарядя хоснували. Каждый артефакт єст описаный, так што окрем самых передметів мож тіж познати слова, котры в днешніх часах не сут уж хоснуваны. Ціліст дополняют выклады працівників музею і кураторскы тексты. Выстава буде одкрыта до 30. септембра/вересня. Більше на тоту тему можете чытати на нашым сайті.

Владыка Кірил єст новым членом Дикастериі до справ святых

Як передала Пресова Служба Апостольской Столиці, в суботу 17. лютого/фебруара папа римскій Франциск призначыл владыку Кірила Василя, архієпископа і кошыцкого єпархіяльного єпископа за члена Дикастериі до справ святых. Владыка Кірил в своім офіцийным комунікаті подякувал за довіря і высловил свідоміст працы звязаной з новыма обовязками. Для владыкы Кірила не єст то перша служба про Святішый Престол. До Кошыц пришол як адміністратор єпархіі в 2020 р., а уж рік пізнійше был вызначеный за єпарху. Перед тым, коли жыл в Римі, был м.ін. членом Верховного Трибуналу Апостольскойй Сиґнатуры в Ватикані, был тіж секретарьом Конґреґациі про східні церкви. Од 2023 р. был папскым делеґатом з особливыма правами про католиків Сирийско-Малябарской Церкви в Індиі.

В Польковицях орґанізуют Центр Молодіжной Активности

В Польковицях представникы міста і мешканці взяли участ в соспільных консултациях, де головном темом было зорґанізуваня Центра Молодіжной Активности. Ефектом дискусиі был вступный зарис локалю при улици Ґлоґовскій, де молодіж буде могла ся стрітити, одпочнути або ся поучыти. До заґаздуваня єст аж 250 м2 [квадратных метрів]. Ініциятором стрічы был віцебургомайстер Польковиц Кжыштоф Нестер. Цілю консултаций было познати опінію молодежы, чого вымагают од центра, та запрезентувати візуализацию заінтересуваным і представникам позаурядовых і освітовых орґанізаций. Присутна молодіж позитивні зареаґувала на концепцию Центра, передала тіж своі думкы што до функцийонуваня того місця.