Сумар дня на 20. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 20. листопада/новембра 2023 р.

Ден Русинів Польщы 2023

Ближыт ся Ден Русинів Польщы 2023. Каждого рока 5. грудня/децембра празднуєме наше нацийональне свято для упамятніня віче во Фльоринці, якє в 1918 році дало початок Рускій Народній Республиці Лемків. Того рока одзначыме тото лемківскє свято в суботу 2. грудня/децембра. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці. О год. 14.30 упамятниме 105. річницю віче во Фльоринці в долинці при грекокатолицкій церкви. Дальше, як каждого рока, споминовы подіі будут проходити в нашій Рускій Бурсі в Ґорлицях. Од 16.00 год. буде там проходила стріча, в рамках котрой буде мож м.ін. выслухати доповід Міляна Яна Піліпа о русиньскій нацийональній симболиці. Артистично подію дополнит выступ діючого при Рускій Бурсі ансамблю Терочка. Подія отримала дофінансуваня з Міністерства Внутрішніх Справ і Адміністрациі. Просиме до спільного святкуваня!

Ювілей русиньской едукациі і писменности на Бачваньскій Руси

В минулу суботу 18. листопада/новембра в Сербіі в Рускым Керестурі одзначыли ювілей русиньской едукациі і писменности – 100. річницю печатаня «Ґраматикы бачваньско-руской бесіды» авторства др. Гавриіла Костельника, 120. річницю предшкільной едукациі в Рускым Керестурі і 270. річницю едукациі в русиньскым языку. Проґрам подіі зрыхтувал Одбор за едукацию Нацийонального Совіту Русинів. Окрем святочной академіі была зрыхтувана і выстава фотоґрафій вказуючых минуле і теперішнє шкіл, в котрых вчат русиньского языка з елементами нацийональной культуры.

В Пряшові выремонтуют памятник Александра Духновича

Місто Пряшів в середу 15. листопада/новембра закінчыло проєкт великой ревітализациі публичных просторів на Пляци Молодежы і сусіднім Пляци Духновича, котрый зачал ся іщы кінцьом літа 2022 рока. Цілковитый кошт ревітализациі обох малых парків то понад 800 тис. евро, з чого векшыну місто позыскало з еврофондів. Головным пунктом Пляцу Духновича єст памятник русиньского будителя Александра Духновича, котрый є твором русиньской скульпторкы Олены Мандіч-Шіналі. Был він одкрытый в 1933 р. підчас Днів Руской Культуры, каждорічной подіі меджевоєнного чехословацкого періоду, в рамках котрой Русины маніфестували свою культуру і істнуваня. Памятник находил ся в центрі міста, одкале в 70. роках был перенесеный. Од долшого часу потрібувал реконструкциі. Місто Пряшів схвалило на реконструкцию памятника 14 тис. евро. Роботы зачнут ся од оправіня його верхньой части – бронзовой скульптуры Духновича. Про історию і плянувану реконструкцию памятника русиньского будителя чытайте в дописі на нашым портали.

«Кычера» глядат новых членів

Лемківскій Ансамбль Пісні і Танця «Кычера» оголосил набір до співочой ґрупы. Як подают, до ансамблю мож долучыти в каждій хвили, але по вынятково успішным сезоні хотіли бы створити постійну вокальну ґрупу. Просят вшыткых охочых, незалежно од віку. Особливо просят і бывшых членів ансамблю, для котрых буде то нагода вернути до споминів і продолжати пригоду з фольклором. Долучыня до ансамблю має позволити на інтеґрацию, меджепоколіньову выміну, а предовшыткым пропаґуваня лемківскых традиций і культуры. Заінтересуваны прошены сут взяти участ в орґанізацийній стрічы, котра пройде ся в суботу 2. грудня/децембра о 12.00 год. в Ліґницкым Центрі Культуры.

Акция збераня плюшовых забавок в Польковицях

Іщы до днес в Основній Школі номер 3 в Польковицях тырват акция збераня новых, плюшовых забавок. Зобраны плюшакы трафлят до підопічных фундациі «На Ратунок Дітям з Новотворовыма Хворотами». Фундация передаст забавкы до онколоґічной клінікы «Przylądek Nadziei» во Вроцлаві. Приносити мож лем новы забавкы – зато што трафлят до хворых діти.