Сумар дня на 20. липця/юлия 2022 р.

Приносиме вам сумар медияльной ґрупы ЛЕМ.фм+ на ден 20. липця/юлия 2022 р.

Нова сідиба устяньскых поліциянтів

В Устю Рускым офіцийні одкрыли новопобудуваный постерунок поліциі. В подіі участ взяли представникы найвысшых державных власти на челі з Маршалок Сойму Ельжбєтом Вітек, были і посланкыні і посланці партиі Права і Справедливіст Барбара Бартусь, Ельжбєта Зєліньска, Патрик Віхер і Аркадиюш Мулярчык. До Устя приіхал і сенатор Віктор Дурляк. Присутны были представникы власти поліциі, самоурядовы власти і представникы найважнійшых інституций в реґіоні. Надінспектор Михал Ледзьон, шеф малопольской поліциі в промові повіл, што новый постерунок буде служыл головні мешканцям і штораз чысленнійшым туристам, што приходят в Низкій Бескід. Нова сідиба устяньскых поліциянтів коштувала веце як 5 млн зл. Стара сідиба од веце як 40 років находила ся в мешкальным будинку, часово заадаптуваным на потребы постерунку. Нова находит ся під адресом Устя Рускє 160.

Via Carpatia штораз ближе

До підкараптского воєводы зложыли внесок выдати позволіня реализувати веце як 10-кілометровый одтинок експресовой дорогы С19 медже узлами Коросно і Місце Пястове. Початок будовляых робіт заплянували на яр будучого рока. Інвестиция коштувала буде веце як 365 млн зл. В рамках задачы выбудуют новый одтинок дороы, два дороговы узлы, а тіж ріжны інжынєрскы обєкты, в тым м. ін. девят мостів ци три переходы для звірят. В місцевости Відач експресову дорогу поведут над желізницьовом дорогом но 108 реляциі Сторожы-Коростенко. Актуальні тырват кінцьовый етап проєктуваня і опрацуваня выконавчой документациі. Експресова дорога С19 то елемент медженародного пути Via Carpatia, што лучыт Пілнічну Европу з Полудньовом. Одтинок ідучый през Польщу чыслил буде 700 км.

Потягом з Кракова до Кошыц?

Еврореґіон Татры діє уж 28 років, але дотепер не мат постійной комунікациі медже сусідуючыма зо собом реґіонами Підгальом а Оравом ци Спишом. Протягом двох тыжнів близко шісто осіб з Польщы і Словациі высловило попертя для думкы получыти обі державы новом желізницьовом ленійом. Од парох років Польща будує нову желізницьову ленію в тяжкым гірскым терені, знану як проєкт Подленже-Пєкєлко. Цілю той інвестициі є значучо скоротити подорож потягом з Кракова в польскы Татры і до Нового Санча. Польска страна є тіж одкрыта розшырити проєкт о Словацию, жебы ленія не кінчыла ся в Закопаным, але обнимала і словацку Ораву, а одтамале зможнила доізд до Братиславы, Попраду ци Кошыц. Приметом нового проєкту буде, што з Варшавы буде мож до Братиславы іти през Словацию, а не як дотепер – през Чехы.

О Шлезаках, лемківскым писменнику і не лем – в Ґорлицях зас пройде літературне свято

Літературный Фестіваль ім. Гаупта плянує в Ґорлицях осму едицию. Того рока зас пройде без міністерияльного підпертя. Так як і минулого рока орґанізаторы одкрыли соспільну колекту на сайті zrzutka.pl, жебы зобрати потрібны середкы, значыт 50 тис. зл. Для підтримуючых акцию передвидженый є шор нагорід. Участ в фестівали потвердили уж м.ін. такы авторы як Збіґнєв Рокіта, автор книжкы Kajś о Шлезаках, локальна авторка Ушруля Гонек ци украіньскы авторы Юрий Андрухович ци Наталия Сняданко. В проґрамі в рамках тематичных стріч Анджей Стасюк розповіст о лемківскым писменнику Мирку Нагачу. Вступ на вшыткы подіі буде дармо. Фестіваль пройде початком жолтня/октобра тр.