Сумар дня на 20. липця/юлия 2021 р.

Приносиме вам сумар медияльной ґрупы ЛЕМ.фм+ на ден 20. липця/юлия 2021 р.

В Будапешті прошла конференция присвячена памяти А. Годинкы

В минулу пятницю, 16. липця/юлия, в Будапешті одбыла ся наукова конференция присвячена памяти Антония Годинкы. Орґанізаторами подіі были Вседержавне Общество Русиньской Інтеліґенциі імени Антония Годинкы, Столичне Русиньскє Нацийональне Самосправуваня і Русиньскы Самосправуваня VI і VIII рейону Будапешту. В рамках конференциі прошло і переданя Преміі імени Антония Годинкы за 2021 рік. Єй лавреатами стали в тым році о. Василь Бойчук – грекокатолицкій священник і долгорічный член Світового Конґресу Русинів з Румуніі, та о. Ласло Пушкаш – грекокатолицкій священник, маляр, родак з Ужгорода, окрем інчого автор книжкы «Кыр Теодор Ромжа. Жытя і смерт єпископа». Участны могли в часі конференциі выслухати лекций на тему жытя і творчости Антония Годинкы ци Русинів і віры в Бога.

Округлый стіл на тему «Верховиньска Акция: предістория, результаты, дозвукы в часі»

3. липця/юлия прошла округла річниця народжыня Едмунда Еґана (1951-1901), мадярского економа шкотского походжыня, котрый завдякы реализациі тзв. Верховиньской Акциі доднес єст чествуваный Русинами як великій реформатор і добродитель. Як інформувала Юлия Шыпович, з той нагоды в конференцийній сали ужгородского Центру Культур Нацийональных Меншын Закарпатя одбыл ся 16. липця/юлия округлый стіл на тему «Верховиньска Акция: предістория, результаты, дозвукы в часі». Орґанізаторами подіі были Русиньскій Культуролоґічный Клюб і Благодійный Фонд ім. Е. Еґана. Участныма были і Общество ім. Александра Духновича і Нацийональна Рада Русинів Закарпатя. Присутны мали нагоду выслухати штырі лекциі тыкаючы м.ін. жытя і діяльности Едмунда Еґана і Верховиньской Акциі.

Закрыты ґмінны дорогы Бортне «Гора» і Бодакаы «Пстружне»

Іщы днес до 16.00 годины будут закрыты дві ґмінны дорогы находячы ся на обшыри ґміны Санкова – Бортне «Гора» і Бодакаы «Пстружне». Причыном того сут актуально ведены частичны ремонты тых доріг, якы проходят од вчера од 7.00 год. рано. В звязку з роботами переізд тыма ґмінныма дорогами в годинах од 7.00 до 16.00 не єст можливый.

В Креници одбуде ся конференция CYBERSEC

В днях од 1. до 3. вересня/септембра Крениця зас буде простором дебаты о найважнійшых цифровых проблемах і можливостях, перед якыма стоят европейскы міста і реґіоны. В курорті одбуде ся конференция CYBERSEC, вчас котрой експерты в обшыри цифровой безпекы будут глядати одповіди на потребы модерной економікы. Єдном з тем буде приспішыня цифризациі, якє выкликала пандемія, і звязане з тым звекшыня можливости атаків в віртуальным просторі. За Пресовым Бюром Маршалківского Уряду Малопольского Воєвідста – значыня бесіды о безпеці в сіти єст більше як перше, кєд же проблемы реального світа переносят ся тепер до сіти. Конференция має дати передуманы одповіди на сучасны проблемы звязаны з будучыма технолоґіями. Цілю подіі єст вказати, же основом модерной економікы єст цифрова безпека. Головным партнером конференциі єст Малопольскє Воєвідство.