Сумар дня на 20. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 20. квітня/апріля 2021 р.

Тема ґорлицкых одпадів занепокоіла послів Яґну Марчулайтіс-Вальчак і Александра Мішальского

Послы Яґна Марчулайтіс-Вальчак і Александер Мішальскій звернули ся до Найвысшой Ізбы Контролі провести поступуваня в справі процесу досліджаня небезпечных одпадів на обшыри бывшой рафінериі Ґлімар, особливо в квестиі звязаній з фінансуваньом і выбором фірмы, котра має вывезти одпады з Ґорлиц. В писмі з внеском послів провести контролю вымінены были не лем фірмы вызначены до утилизациі одпадів, тзн. Raf-ekologia i Mo-BRUK, але тіж Рейонова Прокуратура з Ґорлиц разом з Містом Ґорлиці. Во внеску представлено підозріня, же зорґанізувано пробу вкрасти публичны середкы через згромаджыня незнаных одпадів на обшыри бывшой рафінериі, а пак спрепаруваня доказів маючых потвердити іх небезпечный характер, жебы отримати більшы середкы од Скарбу Державы. Подля посла оціна небезпекы одпадів не была проведена в одповідній спосіб, а пробкы побрано з невельох контенерів презначеных до утилизациі. Як суґерує в писмі Мішальскій, причыном такого діяня може быти факт, же цінник утилизациі одпадів єст залежный од ступени іх небезпекы. Актуально вшыткы одпады, што ся находят ся на обшыри бывшой рафінері, закваліфікувано як небезпечны для середовиска, зато тіж така высока квота іх утилизациі – близко 49 млн зл. Во внеску нашла ся тіж інформация, же згідні з транспортовыма листами єдна з фірм, котра тепер занимат ся утилизацийом, скорше довозила одпады на обшыр Ґлімару.

Як за 100 років буде выглядал світ?- конкурс з нагоды Ґорлицкых Дны Землі

Недавно інформували сме о Ґорлицкых Днях Землі, котры проходят в днях од 17. до 30. квітня/апріля. До спілпрацы з містецкым урядом Ґорлиц прилучыла ся фірма EMPOL і разом просят наймолодшых до плястичного конкурсу «Екосвіт за 100 років». Конкурс направленый єст на учеників основных шків з кляс 1-6. Участникы мусят одповісти на звіданя: як за 100 років буде выглядал світ. Каждый, хто возме участ в конкурсі, нагородженый буде рослином. Найліпша праца вказана буде як наклийка на єдным з комунальных авт фірмы EMPOL. Працы мож слати до 10. мая тр. Результаты будут представлены 1. червця/юнія. Деталі і реґулямін конкурсу находят ся на сайті Уряду Міста.

То іщы не конец ремонту на ґорлицкым рынку

Як подал Містецкій Уряд в Ґорлицях, остатній етап ремонту двох головных улиц Ґорлиц продолжыт ся. Згідні з пляном ремонт Стружівской і Міцкєвича, котры ідут ґорлицкым рынком, мал ся закінчыти в понедільок, 19. квітня/апріля. Єднак зо взгляду на зміняючу ся хвилю і несприятливы ремонтовы обставины працы будут тырвати долше. А то означат, же улиці Стружівска і Міцкєвича будут закрыты іщы што найменше до кінця того тыжня.

Ліґниця буде мала свій лімітуваный банкнот

В ліґницкым Музею Міди прошла презентация нового банкнота, котрый упамятнит 780. річницю битвы під Ліґницьом та 60 років істнуваня музею в Ліґницкым Поли. Банкнот буде мал номінал 0 евро і вказувал буде деревяный костел, де актуально находит ся музей. На фоні буде вказана битва, панорама Ліґниці і печатка князя Генрика Побожного. Буде то другій того рода банкнот посвяченый Ліґници. Емісия колекцийонерского банкнота в лімітуваным чыслі 5 тис. штук єст заплянувана на 29. мая тр.

Фот. Краківска Ґазета