Сумар дня на 20. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 20. грудня/децембра 2024 р.

Західньопоморскій Воєвода стрітил ся представниками нацийональных і етнічных меншын

В понедільок 16. грудня/децембра в Західньопоморскым Воєвідскым Уряді прошла стріча нацийональных і етнічных меншын з Західньопоморскым Воєводом Адамом Рудавскым. Подія прошла в рамках святкувань 20. річниці схваліня Соймом Польской Республикы уставы о нацийональных і етнічных меншынах та реґіональным языку. Темом стрічы была активніст нацйийональных і етнічных меншын на Західнім Помори і іх реляциі з урядовом адміністрацийом і самоурядами. Присутны были представникы лемківской, грецкой, ромской, жыдівской, кашебской, украіньской і німецкой меншын. Підчас стрічы прошол дискусийный панель, до котрого были запрошены представникы штырьох меншын: лемківской, грецкой, украіньской і ромской. Лемківску меншыну репрезентувала Ольга Васєнко-Стефановска. Участ в подіі брали і гоноровы консулі, представникы інституций культуры, служб і костелів.

Беатифікация Петра Павла Ораса одбуде ся в Білках

Як інформувал офіцийный сайт Мукачівской Грекокатолицкой Єпархіі, вчера, 19. грудня/децембра Дикастерия в справах вызнаня святых інформувала о даті і місци святочной беатифікациі – выголошыня за блаженного, отця Петра Павла Ороса. Слуга Божый Петро Павел Орос (1917-1953) был русиньскым священником Мукачівской Грекокатолицкой Єпархіі, в 1944 р. был тайно рукоположеный на єпископа. Згынул з рукы совітского мілициянта. Святочна беатифікация одбуде ся 3. мая 2025 р. в селі Білкы на Підкарпатю. Якраз село Білкы было про отця Петра Павла Ороса послідньом офіцияльном парохійом, на котрій служыл перед ліквідацийом Мукачівской Грекокатолицкой Єпархіі комуністічныма властями. Торжество очелит Його Еміненция Кардинал Ґжеґож Рись, архієпископ і митрополита лодзіньскій. Веце про беатифікацию і жывот Петра Павла Ороса прочытате на нашым портали.

«Еха коляд» в Уличскым Кривым

О тыжден, в суботу 28. грудня/децембра в Уличскым Кривым в окресі Снина одбуде ся подія з назвом «Еха коляд». Буде то стріча при велийній капусті і русиньскых колядах, орґанізатором сут Еха Волчых Гір. В рамках концерту русиньскых коляд запрезентуют ся ансамблі Полонина, Бетлегемці, Сорочка та Домініка Новотна. Окрем того в проґрамі єст обсервация неба і выклад працівника Выгорлятской Звіздарні в Гуменным о Віфлеємскій Звізді. Буде і нагода придбати сой реґіональны продукты. Подія зачне ся о 14.00 год.

Велийна стріча в Рускій Бурсі

Уж заран, в суботу 21. грудня/децембра, просиме до Руской Бурсы в Ґорлицях на велийну стрічу. Подія зачне ся о 15.00 год. Велийна стріча буде получыньом традициі з жывом культуром. Вказане буде богатство лемківскых і гуцульскых різдвяных традиций. Головным пунктом буде доповід др Юстины Чонсткы-Клапиты, знаной етномузиколожкы і антроположкы культуры з Ягайлоньского Університету, авторкы выдатной моноґрафіі «Колядуваня на Гуцульщыні». Прелекция приближыт музичны та соспільны аспекты колядуваня, вкаже, як вельовіковы звыкы фурт влияют на достоменніст локальных соспільности. Вечер прикрасит выступ дітячого ансамблю Терочка, котрый запрезентує традицийны лемківскы коляды. Пак участникы подіі будут мочы покоштувати лемківскы велийны стравы. Вечер закінчыт спільне колядуваня. Вступне на подію дармо, доповід буде выголошена в польскым языку.

Джерело фотоґрафіі: Zachodniopomorski Urząd Wojewódzki