Сумар дня на 20. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 20. грудня/децембра 2023 р.

Бенефіс Юлиі Дошны

В суботу 16. грдуня/децембра в Дворі Карвациянів прошол ювілей 40-літя артистичной діяльности Юлиі Дошны, знаной шыроко амбасадоркы лемкіской співанкы. Суботня подія была подумана так, жебы был то вечер споминів осіб, якы товаришыли артистці в єй артистичный жытю і не лем. Серед запрошеных гости были м.ін. Староста Ґорлицкій Мария Ґубала, Кжыштоф Кжыжановскій, з котрым долгы рокы спілпрацувала артистка – робили разом цикль проґрамів «В себе» для Телевізиі Краків. Як єден з першых свою спілпрацу з Юлийом Дошном споминал Петро Трохановскій, якій привюл тіж рокы спільного музикуваня з ансамбльом «Лемковина» та вручыл почестну грамтоу в імени Стоваришыня Лемків .

Для выполненой по берегы салі, але головні для мамы, выступили тіж м.ін. сынове Юлиі – Лука і Фома, в акомпаніяменті Мирослава Боґоня, вельолітнього акомпаніятора артисткы. На сцені презентували ся тіж ґрупы, з котрвма сучасні спілпрацує Юлия Дошна, то співочый ансамбль Руты Увиты і Меджепоколіньова Театральна Ґрупа Племя. Чысленні згромаджена публика одспівала артистці Многая літа.

Велиі Народів в Ліґници і в Ґожові

В Ліґници і в Ґожові прошли Велиі Народів – святочны стрічы жытелів реґіону, репрезентантів ріжных культур і ріжных меншын. В Ліґници в Королівскій Сали стрітили ся уж 22. раз, зас в Ґожові была то сімнадцета стріча – єй орґанізатором было Стоваришыня Творців і Приятелів Циґаньской Культуры ім. Папушы та Містный Центр Культуры в Ґожові. Вчас велиі участникы колядували, деґустували традицийну кухню зрыхтувану представниками ріжных меншын. На місци были м.ін. Лемкы, Украінці, Жыды, Ромове, але і львівякы, вільнюкы і полешукы. На ліґницкій велиі окрем Поляків, Лемків, Жыдів, Украінців были і Чехы, Американе, Німці, Французы, Туркы та, першый раз представникы Анґолі і Філіпінчыкы. Было колядуваня, складаня желань і представліня святочных звыків новых участинків присутных на велиі.

Просиме до Руской Бурсы

А традицийом уж є, што і в Рускій Бурсі в Ґорлицях проходит в грудни/децембрі Велийна Стріча. Не інакше буде і того рока. Стоваришыня «Руска Бурса» в Ґорлицях сердечні запрашат на пятницю 29. грдуня/децембра на 16.00 год. На початок выступит бурсяный ансамбль Терочка, пак будут віншуваня, а дале – пробуваня смаків Святого Вечера. Надієме ся і на спільне колядуваня. Варило буде ся в бурсі од самого рана, так што охочы можут прити скорше і помочы варити, або помочы святочні прикрасити бурсяны поміщыня, або почытати бібліотечны новости.

Безплатны баданя в Польковицях

Жытелі ґміны Польковиці выже 50. рока жытя можут схоснувати безплатны баданя выкрываня остеопорозы. Рушыл безплатный профіляктичный проґрам. На остеопорозу хворіє што третя жена і што четвертый мужчына. Нелікувана хворота утруднят штоденне функцийонуваня, обнижат комфорт жытя і може вести до поважных, чысленных вломлінь кости. Жебы не дати ся хвороті, необхідна є профіляктика і баданя, особливо по 50. році жытя. Польковицкій проґрам обнимат м.ін. інформацийно-едукацийны діяня тыкаючы здравотной едукациі, естимуваня 10-літнього ризика вломліня кости методом FRAX, денситометричне баданя і дохторску консультацию. Павел Ґамбаль, презес Польковицкого Центра Здравотных Услух подає, што подля іх рахунків до проґраму приступит веце як 10 тис. осіб. В вересни/септембрі тр. в ґабінеті RTG явил ся новый денитометер. Середкы на його закуп передал ґміні Польковиці KGHM. Проґрам реализуваный є штоденно в робочы дни од 10. до 12. год.