Сумар дня на 20. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 20. грудня/децембра 2022 р.

Наступный етап документациі желізницьового получыня Ліґниця-Любін-Ґлоґів

Власти ґміны Польковиці просят выполнити дальшу анкєту тыкаючу створіня желізницьового получыня Ліґниця-Любін-Ґлоґів. Тыжден тому інформували сме о консультацийній стрічы проведеній з жытелями Польковиц, в часі котрой представникы проєктанта бесідували м.ін. о тым, што повело ся зробити дотепер та якы высновкы ідут з анкєт, якы зробил проєктант. Наступный етап звязаный зо створіньом документациі зачал ся од новой анкєты, в котрій находит ся пят можливых вариянтів будовы новой леніі, разом з мапами. Анкєта буде активна до 27. грудня/децембра і мож ю найти на офіцийным сайті ґміны Польковиці.

Волкы в Команчы

Власти Ґміны Команча поінформували, што в остатнім часі на обшыри ґміны были выпадкы закусаня волками домашніх та дикых звірят. До інцидентів дошло в Щавным, Команчы і Новым Лупкові. Просит ся пильнувати і заперати своі домашні звірятя. Власти припоминают, што волк єст в Польщы єдным з пятьох ґатунків обнятых правном охороном, за шкоды котрых одповідат Скарб Державы. Волкы найчастійше сут полохливы і уникают контакту з людми, треба єднак памиятати, же не знатя, як ся будут вести, як будут выстрашены ци хворы. Для безпекы обох стран важне єст, жебы не піднимати діянь, што заохочают звірятя підходити до ґаздівкы. Додатково власти ґміны просят зголошувати до них ситуациі, кєд на обшыри забудувань або барз близко села вкаже ся волк ци медвід. Кажда така ситуация буде реґіструваня, а пак передана до Реґіональной Дирекциі Охороны Середовиска. Такій запис дозволит підняти ріжного рода діяня згідны з обовязуючым правом.

Великій успіх книжкы «Бескід без кіту. Зима»

«Бескід без кіту. Зима» Книжком 2022 Рока Польской Секциі iBbY. Публикация Мариі Стшелецкой, яку печатало влони выдавництво Лібра PL, была выріжнена в двох катеґориях: літературній і ґрафічній. Єст то першый такій примір в істориі конкурсу, же єден твір єст нагородженый в обох тых катеґориях. Конкурс орґанізуваный єст Медженародном Ізбом до справ Книжок для Молодых, котра од понад 30 років выріжнят публикациі для діти. Місце акциі нагородженой книжкы то зимова Лемковина в 20. роках ХХ ст. Прочытаме в ній о дівчатках, котры глядают вітця – каменяря, што не вернул дохыж перед Різдвом. Фоном для іх подорожы сут дика природа Бескіду і штоденне жытя лемківского села. Публикация єст богато ілюструвана одбитками дереворытів, што были вытяты авторком з бескідской зваленой липы.

Новый номер часопису «Маґура»

Вышол черговый, послідній уж в тым році номер часопису «Маґура», в якым чытати мож м.ін. о тогорічній едициі роверового райду через пограниче ци о фауні і флорі в парку, а на послідній страні находит ся дашто для наймолодшых – гры і згадуванкы. Часопис «Маґура» доступный єст в електронічній версиі на офіцияльным сайті Маґурского Нацийонального Парку, але мож тіж придбати друкувану«Маґуру», напримір в сідибі Парку в Крампній.

Лемкыня Дария Шкурат в найліпшій трійці

На конец спортова новина о успіху Дариі Шкурат – членкыні Спортового Клюбу «Хохолів». Дария Шкурат, Лемкыня родом з Бортного, од парох років з успіхом занимат ся лыжныма бігами. В остатнім часі в змаганях Alpen Cup, якы проходили в австрийскым Санкт Ульріх, в катеґориі бігу юньорок на дистансі 10 км свобідным стильом Дария заняла 3. місце, а до выграной бракло лем 39 секунд.