Сумар дня на 20. червця/юнія 2023 р.

Приносиме вам сумар медияльной ґрупы ЛЕМ.фм+ на ден 20. червця/юнія 2023 р.

Ювілей підкарпатскых місцевости

З нагоды святкувань 600-літя Высочан і 500-літя Чыстогорбу, котры припадают на 2024 рік, ґміна Команча просит передавати фотоґрафіі та спомины звязаны з обома місцевостями. Властям залежыт не лем на материяльных памятках, але тіж простій документациі штоденного жытя, істориях ци оповіданях, котры мож списати і принести або выслати. Зархівізуваны документы мож буде видіти на заплянуваных выставах, в публикациях і на інтернетовым сайті ґміны. Вшыткы заінтересуваны прошены сут складати знимкы і спомины в Ґмінным Осередку Культуры в Команчы в підписаных копертах. В інституциі документы будут скануваны, а пак ориґіналы вернут до властителів. Проєкт реализуваный єст при спілпрацы з бескідскым провідником Войцєхом Весолкіном і редактором історичного періодика «Бєщад» Анджейом Щербіцкым.

Крениця з рекордовым зыском з курортных оплат

Крениця узнавана єст за найбарже популярный курорт в Малопольщы уж тепер заробила понад 3 млн 700 тис. зл, а в минулым році о тій порі были лем 3 млн. Місто рахує, што до кінця рока удаст ся зобрати рекордовых 8 млн з курортной оплаты. Сут они побераны од вшыткых туристів, котры рішают лишыти ся на долше як єден ден в курорті. Така ситуация вказує, што чысло туристів каждого рока ся збільшат. Як підкрислят бургомайстер Крениці Піотр Рыба, місто ставлят на туристичну оферту, што приносит результаты. Так зимом, як і літом туристы мают вельо атракций, а рыхтуют ся новы.

В Польковицях промуют етнокультуру

Містецко-Ґмінна Бібліотека в Польковицях просит на цикль стріч і варштатів пн. «Етнокультура? Єм на так». В пляні проєкту находит ся пят блоків, каждый тематично інчый. Перша стріча посвячена буде артистичным варштатам під гослом «Інспірує нас Етнокультура», в час котрых участникы зосерджат ся на архітектурі Нижнього Шлеска. «Кресова спадковина в Етнокультурі» то дискусия на тему вартости культуровой спадковины в родинным жытю з кулінарным акцентом. Орґанізаторы задбали тіж о атракциі для наймолодшых, для них зрыхтуваный єст третій блок: «Байково з Етнокультуром». «Выробы ручной роботы в Етнокультурі» то цикль варштатів тыкаючый традицийный рецептур творіня косметиків, а остатній з блоків – выкладово-варштатовый, посвяченый буде рисуваню, в тым проєктуваню неістнуючых уж народных кроів. Цілю проєкту єст пошырюваня доступу до культуры для жытелів Польковиц і околиц, познаня ріжнорідности і зміцняня локальных звязків. Деталі найдете на сайті міста Польковиці.

В Бортным стрітят ся любителі роверовой ізды

Ґрупа GorliceBike просит вшыткых любителів роверів і адреналіны до участи в Собітковых Роверовых Нічных Прогульках. Тогорічна едиция райду зачне ся і закінчыт на шатровым поли в Бортным, а орґанізаторы зрыхтували для участників дві трасы. Перша долгости 24 км буде кус легша, друга буде долга на 35 км. Оба етапы райду зачнут ся вечером, так,же переізд закінчыт ся перед пілночом. На конец участникы подіі стрічат ся при спільній ватрі. Орґанізаторы припоминают, што каждый мусит задбати о свою безпеку, мати каск та переднє і заднє світло. Більше дрібниц о трасі та можливіст реґістрациі находит ся фейсбуковым сайті райду.

фот. Уряд Ґміны Команча