Сумар дня на 2. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 2. вересня/септембра 2024 р.

Вмер вызначный русиньскій поета Юрко Харитун

З жальом інформуєме, што в пятницю 30. серпня/авґуста, маючы 76 років, вмер русиньскій поета Юрко Харитун. Народил ся він в 1948 р. в селі Стружниця, сниньского окресу. Село тото, як і другы русиньскы села, заникло в 1986 р. в наслідстві будовы резервуару Старина. По студиях в Пряшові Юрко Харитун перенюс ся до Кежмарку, де жыл до смерти. Юрко Харитун належал медже найвызначнійшых і найпродуктивнійшых русиньскых поетів на Словациі по політичных змінах 1989 рока. Окрем того зберал фольклор, а занимал ся і творчістю про діти. Был і якістным ліриком, його поезия была полна снів, любови, споминів, але і жалю – жалю над втраченым рідным селом і цілым крайом, котрого заникніня был свідком за жытя. Творчіст Юрка Харитуна была вельократно доцінена. Был м.ін. лавреатом Преміі Александра Духновича за русиньску літературу, найважнійшой нагороды в русиноязычній літературі, котру уділює Карпаторусиньскій Науковый Центр в Зъєднаных Штатах Америкы, трикратным лавреатом Ціны Александра Павловичa і лавреатом Преміі Александра Павловича уділюваных Літературным фондом на Словациі, занял перше і нераз другє місце в Літературным конкурсі Мариі Мальцовской. Веце про жытя і творчіст Юрка Харитуна прочытате на нашым портали.

Ден памяти священномученика Максима Ґорлицкого

В тым тыжни в Ґорлицях пройдут торжественны богослужыня з ногоды дня памяти священномученика Максима Ґорлицкого. Святочны богослужыня зачнут ся в четвер 5. вересня/септембра в православній катедральній церкви св. Тройці в Ґорлицях вненочном о 17.00 год. В ден свята, в пятницю 6. вересня/септембра одслужена буде ранішня Літургія о 6.00 год., пак о год. 8.30 буде акафист перед мощами св. Максима, о 9.45 привитаны будут владыкы і о 10.00 год. зачне ся головна Божеска Літургія. Припоминаме, што в передден свята покровителя перемышльско-ґорлицкой єпархіі, в четвер 5. вересня/септембра, одбуде ся з благословліня архієпскопа Паісия семе піше поломництво зо Ждыні до Ґорлиц. О 5.00 год. рано в церкви Покровы Пресвятой Богородиці в Ждыни, в котрій крещеный был св. Максим, буде служена св. Літургія, а пак поломникы підут до Ґорлиц через Ждыню, Ґладышів, Маластівску Маґуру, Прислоп, Новицю, Білянку, Шымбарк і Ропицю Польску. Вшыткы охочы взяти участ в поломництві можут ся зголошувати до Фомы Болеха, Наталиі Урды, о. Юлияна Феленчака і о. Ярослава Ґрича до середы 4. вересня/септембра.

В Ропі выремонтуют два воєнны цмонтері

Ґміна Ропа выремонтує два воєнны цмонтері. Самоуряд отримал 480 тис. злотых з Польского Ладу, жебы провести працы на двох некрополиях з І світовой войны, в Ропі і в Лоси. Як подал війт Кароль Ґурскій, іде предовшыткым о консервацию нищіючых елементів цмонтерів. Покля што ґміна єст на етапі конкурсу оферт. Працы выконавці на цмонтерях мают обнимати м.ін. реновацию аттик – поправу написів назвиск і дат.

Нова туристична атракция в Мушыні і Старій Любовни

Віртуальне дзеркало получыт Мушыну і Стару Любовню. Як заповіл бургомайстер Мушыны Ян Ґольба, інвестиция мала бы быти готова іщы в тым році. Получены зо собом екраны будут ся находити на замку в Мушыні і на замку в Старій Любовни. Такы дзеркала стали ся в остатнім часі популярном туристичном атракцийом, котра позвалят обсервувати в теперішнім часі што діє ся в другым місци, а тіж навязати контакт з туристами, котры сут по другій страні порталю.