Сумар дня на 2. січня/януара 2025 р.

Приносиме вам сумар медияльной ґрупы ЛЕМ.фм+ на ден 2. січня/януара 2025 р.

Серенчливого Нового 2025 Рока!

На початок днешніх новин вінчуєме Вам, дорогы слухачы, з нагоды Нового 2025 Рока вшыткого, што найліпше! Витали сме Новый Рік за григорияньскым календарьом – віриме, што дальше будете з нами – Вы, нашы слухачы і любителі радия ЛЕМ.фм. Най Новый Рік буде про нас о вельо ліпшый як старый. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях.

Порталь www.lem.fm і нашы статистикы

В 2024 році порталь www.lem.fm был єдным з найважнійшых медий в русиньскым світі. Протягом рока опубликували сме близко 900 вписів і статій, котры тыкали розмаітых аспектів жытя нашой соспільности. На нашым портали можете прочытати статистику, як выглядало фунцийонуваня порталю в минулым уж році. Особливым заінтересуваньом тішыли ся тексты, котры оповідали о нашым реліґійным жытю, та дописы, в котрых пращали сме заслуженых членів нашого народа. На портали презентуєме зоставліня найпопулярнійшых статій, котры оддают духа миняючого рока, зродили найвекшы емоциі, інспірували до рефлексий, ґенерували тисячы входів. Заохочаме чытати і віриме, же дальше будете радо нас одвиджати!

Ювілейный Рік 2025 пряшівской архієпархіі

В катедральным соборі св. Йоана Крестителя в Пряшові в неділю 29. грудня/децембра владыка Йона Максим, пряшівскый архієпископ і митрополита одкрыл архієрейском літургійом Ювілейный Рік 2025 в пряшівскій архієпархіі. На початку прочытал о. Михал Лещішін, координатор Ювілейного Рока, декрет владыкы, котрым установил 8 ювілейных святых місц в архієпархіі, де буде мож здобыти полноміцны одпусты. По заамбонній молитві, владыка Йона помолил ся на початкок нового Ювілейного Рока, окрем інчого просил о здоровля, покій і мир в цілым світі.

Новы получыня: Ізбы – Высова / Конечна – Высова

Днеска выстартували два новы автобусовы получыня. Інформувала о тым під конец 2024 рока ґміна Устя Рускє. Новы получыня будут на леніях Ізбы – Высова через Ставишу, Брунары і Устя Рускє. Другє получыня буде з Конечной до Высовы через Ґладышів, Смерековец, Реґєтів, Шквіртне, Квятон і Устя Рускє. Орґанізатором транспорту єст ґміна Устя Рускє, яка отримала на тоту ціль дофінансуваня з Малопольского Воєвідского Уряду. Розписка ізды і ціны мают вказати ся на сайті уряду ґміны Устя Рускє.