Сумар дня на 2. січня/януара 2024 р.

Приносиме вам сумар медияльной ґрупы ЛЕМ.фм+ на ден 2. січня/януара 2024 р.

Польковиці схвалили буджет на 2024 рік

Польковицкы радны приняли буджетове схваліня на 2024 рік. Перше позитивну опінію на тему буджету авторства бургомайстра Лукаша Пузнєцкого выдала Реґіональна Обрахункова Ізба (РОІ). В часі остатньой сесиі рады ґміны бургомайстер представил удосконаленый проєкт буджету, де однюс ся до выстосуваных внесків каждой з ґмінных комісий. Фінально радны приняли проєкт, де вдало ся зменшыти квоту зобовязаня ґміны до 199,9 млн зл. В принятым пляні на новый рік находят ся грошы на освіту – понад 85 млн зл, безплатный транспорт, социяльну поміч, охорону здоровля і новы інвестициі. Принятый спосіб плянуваня буджету закладат взяти до увагы в проєкті тзв. свобідны середкы, котры мож перезначыти на актуальны выдаткы. За переданыма рахунками за рік 2023 в ґміні лишыло ся коло 25 млн свобідных середків, котры будут выкорыстаны в тогорічным буджеті, што переложыт ся на обнижыня рівня задолжыня ґміны і быти може дозволит на реализацию додатковых задач.

Того рока ґміна Санкова перезначыт понад 50% буджету на інвестициі

Буджет на 2024 рік схвалила тіж ґміна Санкова. В часі остатньой сесиі, яка проходила 27. грудня/децембра Рада Ґміны єдноголосно схвалила буджет на новый рік, так само як і Вельолітню Финансову Проґнозу на рокы 2024-2035. В новым році найбільша част выдатків, бо аж понад 50%, перезначена буде на інвестициі. Сут то м.ін. будува очыщальні в Кривій, модернізация доріг на обшыри ґміны ци модернізация освітліня в Санковій. Ґміна в своім проєкті забезпечыла тіж понад 2 млн зл на реновацию сакральных обєктів в Санковій, Бодаках, Рухвалді, Кривій, Маластові, Мацині Великій, Ропици Выжній і Бортным. В пляні на надходячы місяці находит ся початок будовы крытых басенів і водной рекреациі в Санковій. Ґміна має тіж реализувати проєкты фінансуваны з зовнішных середків – Ґміна Санкова єст членом Звязку Ґмін Доріча Вислокы, зато в найблизшым часі буде реализувала проєкт з обшыри зелено-синьой інфраструктуры, як поставліня гыбридовых лямп, солярных лавок і резвуарів для жытелів ґміны.

Фінансова підпора на ремонт забытків з новосандецкого повіту

Повітове Староство в Новым Санчы поінформувало, што в 2024 році перезначыт понад 200 тис. зл на ремонт забытків, котры мают історичну, артистичну або наукову вартіст для реґіону. О дотациі можут ся старати фізичны особы або орґанізациі, котры сут властителями забытку вписаного до реґістру забытків находячых ся на обшыри новосандецкого повіту. Фінансову підпору мож перезначыти на проведіня консерваторскых, реставраторскых або ремонтовых робіт. Дотация тыкат рухомых і нерухомых забытків, культурового краєвиду ци документуваня засобів. Фінансова підпора може вкрыти до 75% цілого кошту проєкту. Заінтересуваны деталі найдут на сайті Повітового Староства в Новым Санчы. Внескы мож пересылати до 30. січня/януара тр.

Контролі на граничных переходах зо Словацийом аж до 1. лютого

В пятницю 29. грудня/децембра в Деннику Устав вказало ся розпоряджыня Міністра Внутрішніх Справ і Адміністрациі о приверніню тымчасовой контролі на граничных переходах зо Словацийом. Як мож прочытати, контролі на переходах будут ведены до 1. лютого/фебруара 2024 р. Пресова представничка Граничной Стражы кпт. Анна Міхальска пояснила, што контролі будут фурт ведены лем во віздовым напрямі до Польщы. Нове розпоряджыня нич не змінят, як іде о чысло вызначеных місц до перекрачаня границі.