Сумар дня на 2. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 2. серпня/авґуста 2023 р.

Шлезакы хотят новелизувати уставу о меншынах

Мацєй Копєц, як Посол Шлезской Землі, зложыл 28. липця/юлия на рукы маршалок Сойму друк новелизациі уставы о нацийональных і етнічных меншынах та о реґіональным языку. Цілю новелизациі є дописати до уставы шлезску меншыну як єдну з етнічных меншын в Польщы. В своім соймовым выступліню в тій справі повіл, што його, як посланця, рольом є «дбати о польскій інтерес і польску рацийю стану, о тото, жебы в Польщы жыло ся добрі і жебы нихто не был дискимінуваный, жебы каждый мал право до свойой достоменности». Додал тіж, што добробыт зачынат ся од почутя власной вартости, почутя, што держава шанує, акцептує і узнає каждого зо своіх громадян, што сут єдиницями будуючыма ціле соспільство. Спілавтором уставы, котру посол Копєц зложыл в соймі є Рафал Жепка, активіста зо Шлеска. В Повселюдным Списі 2021 шлезску нацийональніст задеклярувало близко 600 тис. осіб.

Архієпископ Кірил Василь з новыма задачами

Як інформує Пресовый Центер Кошыцкой Єпархіі, кожыцкій єпарха – архієпископ Кірил Василь, остал призначеный папскым делеґатом з особливыма правами про католиків Сирийско-Малябарской Церкви в Індиі, окремо в Архієпархіі Енакулам-Анґамалі. Владыка рыхтує ся в найблизшых днях выіхати на пару тыжнів до Індиі, жебы зробити першу оціну напруженой ситуациі, котра выникат з літургічной реформы з 1991 рока. Непокій медже священниками і вірныма звязаный є з фактом, што по реформі східні церкви были зобовязаны до одновліня автентичной і духовной традициі, через што священник винен служыти літургію на схід ґу престолови, а не оберненый лицьом до люди – Сирийско-Малябарска Церква была в минулости златинізувана і тепер священник служыт одверненый до люди. Владыка Кірил Василь є на становиску, што проблем не мож рішыти на одлегліст, лем безпосереднім розознаньом і оціном на місци – зато першым його кроком на новій посаді буде подорож до Індиі.

Чергове Свято Лосяньскых Мазярів

Уж в тоту суботу пройде чергова едиция Свята Лосяньскых Мазярів.

бесідує Клявдия Збєґєнь, кєрівничка Мазярской Загороды в Лоси.

В проґрамі подіі окрем варштатів звязаных з облечыньом, сут іщы дві презентациі – Марта Ґрабан-Бутрин, фольклористка і етноложка розповіст про «Пісні Лемків», зас пан Фецюх буде презентувал вырабляня ґонтів і выпаляня дегтю. Будут тіж музичны выступы

а лемківскы закускы зрыхтує Кружок Сельскых Ґаздынь Бліхнарка і Приятелі.

І в Ловічы вказуют Новосільского

В Ловичы мож познати творчіст Юрия Новосільского. В просторах Повітовой Публичной Бібліотекы ім. о. прелат Стефана Высоцкого в Ловичы мож обзерати выставу пн. «Юрий Новосільскій. Варшава і Мазовше». Выстава презентує особу і сакральну творчіст Новосільского, котру можеме найти в костелах і церквах Варшавы і цілого Мазовша, м.ін. в костелі Провидіня Божого в Варшаві Весолій, де парохом был як раз Ловичанин, порковитель ловицкой бібліотекы о. прелат Стефан Высоцкій. Його стараньом костел і реколекцийный дім в Весолій збогатили ся о неповторны, авторскы декорациі інтерєру зроблены Новосільскым. На експозицию складают ся пляншы з описами і знимками, а презентуваны сут перед входом до бібліотекы та в голи на першым плянтрі.