Сумар дня на 2. марця 2022 р.

Приносиме вам сумар медияльной ґрупы ЛЕМ.фм+ на ден 2. марця 2022 р.

Русины солідаризуют з громадянами Украіны

Цілый вікенд по початку росийской аґресиі, яка напала на Украіну, приходили выголошыня русиньскых орґанізаций, котры высловлювали свою солідарніст з Украіном і одсуджали крокы Росийской Федерациі. В понедільок, 28. лютого/фебруара, короткє выголошыня подал і Карпаторусиньскій Дослідничый Центр зо Зъєднаных Штатів Америкы. Высловил він солідарніст з колеґами, приятелями і родином на Украіні, а тіж підкрислил, же підтримує територияльну ціліст Украіны і одсуджат діяня росийской влады. День скорше, 27. лютого/фебруара, публично высловил ся і Іван Бузаш (Бинячовскій), член президиі Союзу Русиньскых Писателів Закарпатя (Карпаторусиньского Літературного Общества) і член президиі Народной Рады Русинів Закарпатя. Поінформувал, же орґанізация солідаризує з украіньскым народом, писателі одсуджают буд-яку воєнну аґресию ци діі, котры сут направлены на знищыня буд-котрого народа, просят і діяти ім на поміч.

Помагаш біженцям з Украіны з нічлігом – не забуд того зголосити  

Уряд Міста Ґорлиці просит вшыткых, котры рішыли дати поміч втікаючым перед войном жытелям Украіны в формі мешканя, зголосити тот факт до Уряду Міста. В зголошыню треба подати такы інформациі як імено і назвиско, дату перекрочыня границі, місце побыту і дату, коли біженці были приняты, документ і телефонічный контакт до того, хто дає поміч з мешканьом. Готовый формуляр находит ся на сайті ґорлицкого повіту. Як інформує Уряд, створіня списку місц, в котрых находят ся біженці, дозволит запевнити ім не лем безпеку, але тіж одповідню медичну опіку, а в дальшій часовій перспективі доступ до едукациі для наймолодшых.

«Малопольскє Село 2022»

Уж шестый раз Малопольскє Воєвідство зорґанізувало конкурс шолтыств «Малопольскє Село 2022». Головном цілю конкурсу єст выріжнити села і іх жытелів активні діючых в обшыри збільшаня атракцийности малопольского села. Конкурс поділеный єст на три катеґориі: Найкрасше Малопольскє Село, Новаторскє Малопольскє Село і Малопольскє Село в Сіти. Участниками конкурсу можут быти шолтыства зголошены ґмінами з обшыри малопольского воєвідства, при чым кажда ґміна може зголосити лем єдно шолтыство в єдній або в двох катеґориях. Цілковита высокіст фінансовой підпоры для тогорічных лавреатів конкурсу то близко 500 тис. зл. Ґміны можут складати своі внескы до 23. марця тр. Фінансовы нагороды будут признаваны в формі дотациі для ґміны з презначыньом на реализацию задач в выграным шолтыстві. Выбраны задачы мусят служыти збільшыню атракцийности села або поправі жытя його мешканців.

«Плястікова Одисея» – пленерова выстава

Од 28. лютого/фебруара на польковицкым рынку мож обзерати пленерову выставу «Плястікова Одисея». Выстава єст частю едукацийной кампаніі #mniejplastiku реализуваной банком Credit Agricole разом з еколоґом Домініком Добровольскым. Знимкы зрыхтувал фотоґраф Доброміл Носек. В своіх працах вказал смітя зобране на польскых пляжах і гірскых путях в часі минулорічных акций «Гірска Одисея» і «Балтийска Одисея». Выставу скоментувал бургомайстер Польковиц Лукаш Пузнєцкій. Повіл, же Польковиці то ґміна, котра старат ся дбати о еколоґію, а едукацийна выстава може помочы в борбі з заливаючым нас плястіком. Додал тіж, же едукацийный вымір выставы буде приносил корысти особливо наймолодшым, котрых уж тепер треба зачати едукувати на тему еколоґіі. Выставу мож буде обзерати до 25. марця, а в рамках тогорічной едициі прятаня орґанізаторы просят до участи в «Вісляній Одесиі», цілю котрой єст попрятати понад 1000 км берегів рікы од єй джерела аж по сам выхід до моря.