Сумар дня на 2. марця 2021 р.

Приносиме вам сумар медияльной ґрупы ЛЕМ.фм+ на ден 2. марця 2021 р.

Протест в ґорлицкым шпытали

Вчера, 1. марця, на обшыри ґорлицкого шпыталя зачал ся протест. Страйкуют працівникы Закладу Регабілітацийно-Социяльных Услуг з Катовиц, зовнішньой фірмы, котра од років занимат ся обслугом шпыталів, в тым і ґорлицкого. Протестуючы скаржат ся не лем на вынагороджыня, якє отримуют за свою роботу, але і на условія, якы в ній пануют. Працівникы роками роблят, не маючы умовы о роботу, а годинова ставка за роботу єст часто зміняна. Бесідуют тіж о незрозумілым розраховуваню переробленых годин і прислугуючых ім урльопів. Протестуючы мают ся стрітити з координатором фірмы з Катовиц.

Першы пациєнты зо Словациі будут лікуваны в ґорлицкым шпытали

Як подає інформацийный сервіс HaloGorlice, днес штырьох першых заграничных пациєнтів має трафити під опіку ґорлицкых дохторів. Перед тыжньом премєр Матеуш Моравєцкій запропонувал нашым сусідам Словакам і Чехам місця в польскых шпыталях для пациєтнів в найгіршым стані в звязку з заражыньом COVID-19. Пропоминаме, што актуально в обох державах ситуация єст барз тяжка, а чысло хворых жытелів дале ся збільшат. Згідні з бесідами представників польской і словацкой станы од початку марця малопольскы шпыталі зачынают принимати словацкых пациєнтів в найгіршым стані. Перше хворы кєруваны будут до шпыталів в Новым Торгу і Ґорлицях, пак быти може до Крениці. Бесіды з чешскыма властями тырвают.

Як лем буде теплійше, то зачнут ся ремонтовы працы на креницкым дептаку

Бургомайстер Крениці Пьотр Рыба в бесіді для радия Новый Санч заповіл, же як лем зробит ся теплійше, то зачне ся ремонт на дептаку. Модернізацийны працы тыкают ся зміны верхньой верствы та ремонту канализациі. Працы пройдут етапово, на початку цілый дептак буде перекопаный, а канализация вымінена, з той причыны самоуряд жде на отепліня. Етап другій то укладаня ґраніту. Цілый ремонт має закінчыти ся перед кінцьом того рока. Кошт інвестициі то 15 млн зл.

«Заночуй в лісі» – новы можливости стрічы з природом

Добра відоміст для любителів сурвівалю і близкых контактів з природом. Од 1. мая мож буде леґальні ночувати «на дико» в лісі. Як можна ся додумувати, не буде то можливе в каждым місци, але Державны Лісы вызначат специяльны обшыри на своій териториі, де мож буде прити зо своім шатром і переночувати. Такы обшыри возникнут в каждым надлісництві в державі. До того часу устава боронила розкладати ся з шатром в лісах, єднак зо взгляду на великє заінтересуваня темом власти Державных Лісів рішыли основати проґрам «Заночуй в лісі». В 2020 році веденый был пілотажовый проґрам, в котрым вызначено 46 ріжных місц в цілій Польщы і провірено, як нова думка єст одберана і ци не буде то зо шкодом для лісів. Результаты проєкту были старчаючо добры, же рішено додати новы місця. Доцільово в каждым надлісництві обшыри удоступнены для нічлігів мают заняти обшыр коло 1500 гектарів. Згідні з вымогами, зголошуваня побыту не буде конечне, кєд ночуючых буде менше як 9 осіб і лишат ся не долше як дві ночы єдна по другій. Інакше кєд ночувало буде більше як 9 осіб або долше як дві ночы, в такій ситуациі треба буде выслати електронічне зголошыня до надлісництва, на обшыри котрого проходил буде нічліг. В обох припадках можлівіст ночувати єст дармова. Што барз важне, вшыткы корыстаючы з такой можливости сут зобовязаны попрятати за собом і лишыти місце такє, як было оно в початковым стані. Як повіл ґенеральный директор ДЛ Анджей Конєчный, надіє ся він, же проґрам і того рока притягне до лісів многє чысло любителів природы.