Сумар дня на 2. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 2. лютого/фебруара 2023 р.

Неоціненый репортаж о «Лемковині»

Польска Телевізия (ТVP) в рамках веденой цифровой реконструкциі старых фільмів находячых ся в єй архіві в остатніх днях выпустила здіґітализуваный образ о діяльности славного Репрезентацийного Ансамблю Лемків в Польщы «Лемковина». Тот неоціненый, 25-минутовый фільм был зниманый рівно 40 років тому – в 1983 р. В репортажы під наголовком «Нештоденны істориі – Лемковина» можеме видіти членів ансамблю в моменті, коли колектив был найбарже успішный. Окрем Маестра Ярослава Трохановского і його найблизшой родины можеме видіти і чути польского поету Єжы Гарасимовича, а тіж членів ансамблю, м.ін. Петра Трохановского ци Федора Ґоча. Видно і конферансиєра «Лемковины» – Павла Стефановского. Фільм єст доступный дармо на сайті cyfrowa.tvp.pl (мотузок подаєме тіж в статі на нашым портали).

Концерт коляд на Королівскым Граді

29. січня/януара о 17.00 год. в Великій Сали Королівского Граду в Варшаві уж осмый раз одбыл ся орґанізуваный православном парохійом св. Йоана Климака та Стоваришыньом «Вірны Традициі Поколінь» концерт коляд. Госло тогорічной едициі концерту то: «Ратуйме вольскы забыткы для будучых ґенераций в році Юрия Новосільского». Головным цілю той благодійной акциі єст, жебы ратувати памятникы на православным цмонтери на Воли в Варшаві. В попередніх роках зберано грошы на поміч дітям в Сириі, серньорам в домах опікы ци тіж на спомаганя будовы новых церкви. В рамках варшавского концетру запрезентували ся ріжны ґрупы, котры колядували в східньославяньскых языках. Окрем колективів і солистів з Варшавы, Підляша ци Холмщыны, запрошыня колядувати приняла і лемківска ґрупа Припадок з Нижнього Шлеска. Концерту выслухали предстоятель православной Церкви в Польщы – митрополита Сава, архієпископ Александер, што прибыл з Украіны, єпископ гайнівскій Павел та представникы польскых власти.

Через цілый рік стрічы Карпатского Товариства

Хоц минул нам уж першый місяц 2023 р., то заохочуєме запознати ся з проґрамом «Карпатскых Стріч» орґанізуваных онляйн Карпатскым Товариством. Розписку мож найти на сайті karpaccy.pl. 27. січня/януара одбыла ся перша того рода стріча. Найблизша буде такой о місяц – 2. марця дискутанты зосередят ся на селі Лопянка. Приміром в липци/юлию буде бесіда з Богданом Ґочом про Музей Лемківской Культуры в Зындрановій. Такой на каждый місяц рока штоси єст заплянуване – што в даякій спосіб навязує до Карпат, іх люди, істориі і культуры. Карпатскє Товариство основали в 1990 р. – од початку творили го люде выходячы з варшавского академіцкого туристичного середовиска, головно зо Студентского Кружка Бескідскых Провідників.

Стріча в Музею присвячена памятни Анны Галґашовой

Як інформує Музей Русиньской Культуры в Пряшові, 16. лютого/фебруара одбуде ся подія посвячена 100. річници народжыня Анны Галґашовой, русиньской писателькы і зберателькы нашого фольклору. Галґашова вродила ся в днес уж неістнуючым селі Стружниця. Окрем інчого занимала ся і русиньскыма вышыванками, писала тіж поезию. З нагоды річниці пряшівскій музей рыхтнує акциі посвячены ювілейови Анны Галґашовой. Подія зачне ся о 16.00 год.