Сумар дня на 2. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 2. листопада/новембра 2022 р.

Делеґация з Амбасады Республикы Словеніі в Польщы приіхала до Ґорлиц

Перед тыжньом, 24. жолтня/октобра, до Ґорлиц приіхала делеґация з Амбасады Республикы Словеніі в Польщы – першый раз місто гостило нового Амбасадора Словеніі, Бояна Поґрайца, котрому товаришыли Аташе Обороны Республикы Словеніі Ґоразд Бартоль, капелян Словеньского Войска о. Матей Якопич та асистент капеляна Клемен Шавбаль. Члены делеґациі стрітили ся з бургомайстром Рафалом Кукльом. По візиті в ратушы гості вєдно з властями міста пішли на воєнный цмонтір но 91, жебы оддати чест героям І світовой войны під памятником словеньскых жолнірів помершых в роках 1914-1918 та під центральным крестом. На конец делеґация одвиділа Ізбу Памяти, што находит ся при ґорлицкым рынку – пообзерали там експонаты з часів обох воєн.

Близко 800 новых дерев в ґорлицкым

65-особова ґрупа сеньорів з Університету Третього Віку в Ґорлицях засадила 150 дерев на обшыри Радоцины. Насаджыня дерев прошло в рамках прогулькы орґанізуваной Надлістництвом Ґорлиці в рамках проєкту LIFE-IP EKOMAŁOPOLSKA «Дерево од Повіту, для добра климату». Саджыня рослин в скорше зрыхтуваных місцях попереджене было коротком лекцийом заступці надлісничого Конрада Барчыка та лісничого Анджея Пікора. Інформацийно-едукацийна кампанія «Дерево од Повіту, для добра климату» была пошырена, бо в днях од 17. до 26. жолтня/октобра в цілым ґорлицкым повіті засадили близко 800 дерев, а при урядах ґмін роздали 700 саджінок яблінкы. Староста повіту Мария Ґубала засадила тіж симовличны деревка при повітовых єдиницях – при Домах Социяльной Опікы в Ґорлицях, Климківці та Специяльных Осередках Шкільно-Выховавчых в Шымбарку і Кобылянці та коло Дому Дітины в Ґорлицях.

Тым разом аж в двох місцях

Уж о пару днів стартуют пятнадцеты Стрічы Трьох Поколінь з Лемківском Культуром. Дводньова подія пройде 5. листопада/новембра в Пшемкові, а ден пізнійше – 6. листопада/новембра в Шпротаві. Орґанізатором подіі є пшемківскій Кружок Стоваришыня Лемків вєдно з ансамбльом Ластівочка, діючым при орґанізациі. В проґрамі обох стріч є концерт Лемківского Ансамблью Пісні і Танця Ластівочка разом з запрошеныма гістми. Початок о 16.00 год.

Новый герб Польковиц

Радны єдноголосно приняли проєкт нового гербу Ґміны Польковиці. Новый симбол міста і ґміны єст упорядкуваным геральдичні знаком, заакцептуваным Ґеральдичном Комісийом при Міністерстві Внутрішніх Справ і Адміністрациі. Попередній герб і барвы міста были приняты по системовых змінах. Приняты в тамтым часі символы не односили ся єднак до історичной традициі і принципів геральдикы, але выходили з навязаня до гербу Польковиц выданого на принагідній карті з ІІ пол. ХІХ ст. В остатнім часі самоуряды зачали заступувати дотеперішні гербы і фаны, рішены з нарушыньом принципів геральдикы, на такы, што сут результатом геральдичных експертиз. Протягом послідніх років новы гербы приняли сусідуючы з ґміном Радваниці ци Ґрембоціце, але тіж напр. Новый Санч. Експертизу для Польковиц зробил проф. Войцєх Стжыжевскій, історик і геральдик з Зеленогірского Університету. Новый взір гербу будут постепенно вводити, а записы схваліня дозваляют даякій час фунґувати в містецкым просторі обом версиям гербу – старому і новому, до моменту аж елементы зо старым гербом натуральным ритмом заступлят тоты з новым.