Сумар дня на 2. липця/юлия 2021 р.

Приносиме вам сумар медияльной ґрупы ЛЕМ.фм+ на ден 2. липця/юлия 2021 р.

Літні Семінары 2021

Карпаторусиньскій Дослідничый Центр, діючый в Зъєднаных Штатах Америкы, просит до участи в тогорічных Літніх Семінарах, якы орґанізуваны сут Фундацийом John and Helen Timo. На Літні Семінары 2021 складают ся інтерактивны презентациі тыкаючы новых прац з обшыри карпаторусиністикы і важны дискусиі о тым, што днес значыт быти Русином. Єдном з подій буде дискусия русиньскых активістів з ріжных держав на тему актуального стану русиньской культуры в Европі. Членом дискусиі з польской стороны буде Марта Ватраль. Семінары будут ся одбывати на плятформі Zoom каждого дня од 12. до 16. липця/юлия в полудне. Вшыткы будут трансмітуваны нажыво, што позволит участникам давати презентуючым звіданя. Награня з прелекций будут пак доступны в сервісі Ютюб. Участ в семінарах єст дармова, при чым вымагана єст скорша реґістрация.

Перед Іконом Пресвятой Вогородиці з Клокочова молили ся в Римі

Од 28. червця/юнія до 2. липця/юлия тр. проходит пут вірных Кошыцкой Грекокатолицкой Єпархіі в Римі вєдно з чудотворном Іконом Пресвятой Богородиці з Клокочова. В минулым році прошла 350 річниця слезиня іконы. Пут з нагоды ювілею была перенесена на тот рік з причыны пандеміі. Коло 250 путників з Кошыцкой Єпархіі веде кошыцкій єпарха, владыка Кірил Василь. Участный є і владыка Андрий Пацак, емеритуваный торонтскій єпарха. 29. червця/юнія, на праздник свв. апостолів Петра і Павла, Ікона Пресвятой Богородиці з Клокочова была выставлена в Ватиканьскій Базилиці на торжественных богослужынях, котры одправлял папа римскій Франциск. Папа молил ся перед іконом на початку і кінци торжественных боголужынь. Путників і владыків поздоровил на авдиєнциі, яка ся одбыла 30. червця/юнія.

Одкрыте нове автобусове получыня Меджелабірці – Свидник

Крайска Орґанізация Туристичного Руху Пілнічно-Східня Словация одкрыват літом, подібні як минулого рока, сезонове автобусове получыня медже Меджелабірцями а Свидником. Туристичный автобус «Вышній Земплин» буде іздил в вікенды од 1. липця/юлия до 19. вересня/септембра 2021 р. Є він допасуваный до польско-словацкого получыня Санок-Лупків-Меджелабірці. Туристы з Польщы можут рушыти з Санока, а пак в Меджелабірцях пересісти ся до автобусу на Свидник. Так само скоординуване єст получыня в другу сторону. Вчас подорожы буде нагода познати історию, культуру ци архітектуру пілнічно-східньой Словациі. Як бесідує Мартін Яношко, директор реґіональной туристичной орґанізациі Severovýchod Slovenska, автобусова ленія є продолжыньом минулорічного пілотажового проєкту. Інакше як влони, туристам буде товаришыл професийный провідник. Змодифікувана буде і траса – протягом єдного переізду буде мож обзерати Музей Сучасной Штукы Енді Варголя, Монастыр в Красным Броді, Войсковый Музей в Свиднику та деревяны церкви находячы ся на списку світовой спадковины ЮНЕСКО.

Молитвы за душу блаженной памяти Богдана Ґамбаля

Днес, 2. липця/юлия, выпадат перша річниця смерти Богдана Ґамбаля (1965-2020), выдатного лемківского діяча, реактиватора ґорлицкой Руской Бурсы і основателя першого лемківского радия ЛЕМ.фм. Заран, в суботу, 3. липця/юлия, о год. 11.30 просиме до участи в молитвах за душу Усопшого. З огляду на непевну погодову ситуацию і заляны дорогы, будеме іщы інформувати о місци, в якым пройдут молитвы – або в каплици на св. Горі Явір над Высовом, або в церкви св. Параскєвы в Устю Рускым. Богослужыня очелит грекокатолицкій священник о. Ярослав Чухта. Служены будут Божеска Літургія, пак Панихіда. Вічная Памят!