Сумар дня на 2. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 1. квітня/апріля 2020 р.

Борба з наслідствами пандеміі. Закон підписаный

Президент Польской Республикы Анджей Дуда підписал специяльный закон тзв. антикризисовый щыт, якій має хоронити перед наслідствaми пандеміі коронавіруса. Президент склал підпис пізным вечером, 31. марця, по тым як процедували над ним Сойм і Сенат. Сойм остаточно принял закон в своім пропонуваным виді, одшмаряючы поправкы зголошены сенатском векшыном. Спецустава має принести підпору для польской економікы, підприємнців, працівників, роботодавців, а тіж рільників. В пакєті, котрый пропонує держава, находит ся вельо розвязань, што тыкают вынагороджыня і доходів осіб, якы ведут єдноособову діяльніст. Закон передвидує специяльны доплаты, в припаді коли фірма не робит або робит в обниженым вымірі працы. То і фінансова поміч для робітників, але і роботодавців. Держава дає так само можніст звільнити на три місяці з обовязку плачыня складок на социяльну секурацию. Вшыткы деталі находят ся в принятым пакєті тзв. антикризисового щыта.

Будуют ходникы в Смереківци і Квятони

В лемківскых селах Смерековец і Квятонь будуют ходникы. В Смереківци тротуар є кладеный по правій стороні дорогы, кєд іде ся од Ґладышова. Дальше кєд зо Смереківця входиме до Квятони ходник єст будуваный по лівій стороні, кєд ідеме до Устя Руского. Ходникы в обох селах сут будуваны в більшости на долгости цілых місцевости, головно в тых місцях, де найвекше заселіня. Точны пляны будовы тротуарів в Смереківци і Квятони ґміна Устя Рускє оголосила в вересни/септембрі влони. Товды тіж явил ся проєкт будовы ходника в Брунарах. Будова ходників в ґміні Устя Рускє то єден з головных проєктів веденых том ґміном в послідніх роках. Скорше побудувано іх уж м.ін. в нижній части Ґладышова, в Ждыни ци Конечній. Постепенно являют ся они і в другых селах. Не каждому любит ся єднак така зміна, понеже на все змінят то давный вид лемківскых сел, котрый і так помалы одходит в непамят.

Королівскій властительом Віслы?

В найблизшых днях єден з найбарже популярных польскых футбольовых клюбів Вісла Краків змінит своіх властителів. Є тото можливе на основі веденых договорів. Подля доступных інформаций – новыма властителями клюбу мали бы стати знаный польскій футболіста Якув Блащыковскій, Томаш Яжджыньскій і Ярослав Королівскій, Лемко родом з Ганчовы, якы од понад рока заряджают Віслом, хоц пакєт 100% акций футбольового звязку єст фурт в руках Спортового Товариства «Вісла». На початку 2019 р. Блащыковскій, Яжджыньскій і Королівскій пожычыли Віслі в сумі 4 мілийоны золотых, жебы ратувати тот єден з найстаршых польскых футбольовых клюбів. Неґоцияциі тырвали уж од долшого часу. Як подают медиі, троє заінтересуваных долго не могло ся добесідувати з Товариством, м.ін. што до історичной назвы клюбу ци гербу. Вчера як раз трійка і Спортове Товариство оголосили, што єст порозумліня. Обі страны мают мати остаточно по 50% прав до назвы і гербу. Клюб дальше має долгы і фурт потреба фінансовой помочы, жебы міг выйти на просту.

Прашівскій Самосправный Край выділил пілтора мілийона евро на борбу з коронавірусом

Пряшівскiй Самосправный Край в одповіди на наслідства пандеміі выділил зо свого буджету пілтора мілийона евро. Подля минулотыжньовых інформаций Нацийонального Банку Словациі пандемія коронавіруса може спричынити пряшівскій жупі неґативный прихід на розрахунок в сумі од 9. aж до 38. млн евро. За словами Дашы Єленьовой, пресовой секретаркы Уряду ПСК, буде він мусіл зробити переоцініня плянуваных інвестиций на 2020 рік і будуче, так само рахувати ся з фінансовыма ограничынями в буджеті. Єленьова офіцияльно потвердила, а заєдо остерегла, што шпаруваня грошы в будучности не обыйде і такых обшыри, котры ся тыкают вшыткых діянь веденых самоурядом і його політикы.