Сумар дня на 2. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 2. грудня/децембра 2020 р.

Дальшый розвиток освітньой діяльности медже грекокатолицкыма русиньскыма вірныма

В четвер, 26. листопада/новембра, архієпископ Кірил Василь, Апостольскій Адміністратор Кошыцкой Єпархіі, принял в просторах Грекокатолицкого Єпархіяльного Уряду в Кошыцях представників Общества св. Йоана Крестителя. Общество, котре розвиват освітню діяльніст медже грекокатолицкыма русиньскыма вірныма на териториі Словациі, репрезентували на стрічы священникы Ярослав Поповец, Мартін Костілник, Мілан Ясик і Іван Барна. Владыку Кірила поінформували о активностях, публикацийній діяльности і плянах Общества. Плянуют м.ін. выдати русиньскій молитовник пн. «Радуйте ся в Господі». До друку є приготовленый і русиньскій переклад цілого Нового Завіту. Кошыцкій Апостольскій Адміністратор выразил свою підпору і дал благословліня на дальшу діяльніст Общества про духовне збогачыня русиньскых грекокатолицкых вірных. Припомнйме, же в вересни/септембрі владыка Кірил призначыл в Кошыцкій Єпархіі вікариів про Мадярів, Русинів і Украінців.

Русиньскы вчены на онляйновій конференциі

Вседержавне Oбщество Русиньской Інтеліґенциі імени Антония Годинкы, котре діє серед Русинів на Мадярах, орґанізує Медженародну Наукову Онляйнову Конференцию Памяти Проф. Іштвана Удварі. Як поінформувала нашу редакцию Мариянна Лявинец, конференция пройде 5. грудня/децембра на плятформі ZOOM. Выступлят м.ін. Михаіл Капраль, Олена Дуць-Файфер, Валерий Падяк, Михайло Фейса, Володимір Фенич, але і дальшы вчены з мадярского середовиска. Хто бы хотіл як слухач взяти участ в конференциі прошеный є о скоршый контакт, майльовый адрес подаєме в дописі на портали про подію. Славіста і педаґоґ проф. Іштван Удварі, в памят котрого проходит конференция, жыл в роках 1950-2005. Од 1997 р. был членом Мадярской Академіі Наук. Был м.ін. выкладовцьом росийского, украіньского і русиньского языків в Высшій Педаґоґічній Школі в Ніредгазі, де в 1992 р. основал Катедру Украіньской і Русиньской Філолоґіі, яка фунґувала до 2013 р. Інтересувал ся анализом русиньскых текстів, працувал тіж над языком і літературом Русинів Войводины.

Презентация книжкы «Перша ліґа парібків. Лемківскы публицистичны тексты» од Руской Бурсы

В тоту суботу, 5. грудня/децембра, пройде презентация публикациі пн. «Перша ліґа парібків. Лемківскы публицистичны тексты» з текстами авторства Ваня Гунянкы, Петра Медвідя і Богдана Ґамбаля, выдавцьом котрой є Стоваришыня «Руска Бурса» в Ґорлицях. З огляду на епідемічну ситуацию і звязаны з ньом рестрикциі подія буде заперта для публикы. Просиме позерати на онляйнову трансмісию на фанпейджы радия ЛЕМ.фм та слухати радия ЛЕМ.фм, на антені котрого так само буде проходила трансмісия. Початок 16.00 година. Дата презентациі книжкы не єст припадкова. Як раз того дня празднуєме Ден Русинів в Польщы, схваленый Світовым Конґресом Русинів на памятку основаня Руской Народной Республикы Лемків. Головным пропаґатором і орґанізатором попередніх святкувань Дня Русинів в Польщы был Богдан Ґамбаль, вызначный лідер русиньского соспільства, якого несподівана смерт попереджена коротком хворотом взяла 2. липця/юлия 2020 р. За його стараньом повело ся выдрукувати книжку, хоц сам не встигнул єй видіти. Припомнийме – субота, 16.00 год., радийо ЛЕМ.фм.

Буде реґіональный музей в Польковицях

Містецка Рада в Польковицях приняла резолюцию ініциюючу основаня в Польковицях реґіонального музею. Внескодавцьом проєкту был бургомайстер Лукаш Пузьнєцкій. Вступні плянує ся, што першый в повоєнній істориі міста музей Польковиц і Польковицкой Землі буде находил ся в поміщынях над Містецко-Ґмінном Публичном Бібліотеком, буде тіж фунґувал в рамкаж орґанізацийной структуры Центра Культуры в Польковицях, жебы не ґенерувати додатковых коштів. В заміріню буде то місце, в котрым буде мож дознати ся про історию реґіону – од середвіча аж по найновшы часы. Буде зберал, описувал і експонувал розмаіты історичны материялы та стисло спілпрацувал з інчыма музеями в реґіоні, м.ін. з ґлоґівскым музейом, де находит ся пару тисячів артефактів звязаных з історийом польковицкой землі.