Сумар дня на 19. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 19. жолтня/октобра 2023 р.

Премєра приповідкы од Театру Александра Духновича

Театр Александра Духновича в Пряшові по двох роках зас потішыт найменьшу публику. А то за справом того, што уж в в найблизшу пятницю 20. жолтня/ октобра одпремєрує на своій Великій Сцені припоповідку «Сіль над золото», котра належыт до студника словацкых народных приповідок. Істория о трьох дівках і пышным королю інсценізувана на професийональній русиньскій театральній сцені буде подля творців полна масок, гумору, рухів, чарівных возиків і поезиі. Пєса є головно спрямувана до діти, кєд же они самы мают інтерес о выставляня театром приповідок. «Сіль над золото» як гіст в ТАД режысерувал Каміль Жішка. В новій приповідці грают Володимір Рогач, Мартін Оравец, Владиміра Штефанікова, Зузана Ковальчікова і Данєла Либезнюк. Переклад пєсы робил Валерий Купка.

Одкрытя явориньской дижуркы GOPR

Початком тыжня одкрыто на Креницкій Яворині выремонтувану дижурку – Теренову Ратункову Стацию Креницкой Ґрупы GOPR. Будинок был одданый для ратівників в 1975 році і через цілый тот час служыл для безпекы в Сандецкым Бескіді. Пару років тому з причыны планного технічного стану дижурка мусіла быти вылучена з хоснуваня, а ратовничы дижуры были перенесены до выжньой стациі Ґондольовой Колейкы на Яворині. В тым часі глядано фондів на ремонт. Вкінци вдало ся зробити головный ремонт. Реновация была можлива м.ін. завдякы дофінансуваню з Маршалківского Уряду Малопольского Воєвідства. Буде дальше причыняла ся до безпекы на Яворині.

В Польковицях і Любіні одбыл ся Фестіваль Наукы

«Наука порушат» – то госло 26. едициі Нижньошлезского Фестівалю Наукы, єдна з части якого орґанізувана є в Польковицях і Любіні. В проґрамі сут популярнонауковы выклады і лябораториі, в котрых берут участ м.ін. ученикы. Ґаздом польковицкой части Фестівалю є Учельня Яна Выжыковского. Выклады веде выспецялизувана кадра. Єдным з цілів стріч є заохотити молодых люди до розвитку науковых заінтересувань, так жебы пак могли продолжати іх на студиях. Першый выклад тыкал темы штучной інтеліґенциі. Фестіваль тырвал два дни – до вчера, 18. жолтня/октобра. Одбывал ся паралельно в Польковицях і Любіні. Інчом темом было м.ін. здоровля – бесідували о тым, же вартат о него дбати. Нижньошлезскій Фестіваль Наукы є популярнонауковом подійом орґанізуваном од 1998 р. Актуально одбыват ся каждого рока в вересни/септембрі і жолтни/октобрі.

ПСК отримал грошы на дальшый розвиток

На територияльный розвиток Пряшівского Самосправного Краю піде близко 180 млн евро, поінформувало о тым словацкє Одділіня Комунікациі Пряшівского Самосправного Краю. Грошы розділено медже першых 85 проєктовых замірів з ріжных обшыри. Дозволят они наприклад выбудувати Талантцентр, інтеліґентны автобусовы пристанкы, центры інтеґруваной здравотной старости ци містецкы ясла. О розділіню фінансовых середків вырішыла 6. жолтня/октобра Рада Партнерства ПСК, котрой задачом є забезпечыти ефективне черпаня еврофондів в новым проґрамовым періоді. Што цікаве, ПСК помалы переходит на систем, якій фунґує в Польщы, значыт о черпаню еврофондів будут рішати реґіональны структуры.