Сумар дня на 19. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 19. вересня/септембра 2022 р.

Русиністична конференция в Будапешті

В минулым тыжни в Будапешті одбыла ся медженародна конференция пн. «Світова русиністика днес: вопросы теориі і практикы». В днях од 15. до 18. вересня/септембра в мадярскій столици зышли ся науковці, котры занимают ся русиністиком, але і гості, котры репрезентуют Русинів в окремых державах. Орґанізатором конференциі был Русиньскій Науковый Інститут ім. Антония Годинкы. 16. і 17. вересня/септембра проходили пленарны засіданя. Першый ден проходили они в просторах мадярского парляменту. Другій ден конференция перенесла ся до сідибы Вседержавного Русиньского Самосправуваня. Своі рефераты, тыкаючы языка, літературы і істориі Русинів, чытали русиністы з Мадяр, Словациі, Украіны, Сербіі і Японіі. На конференциі присутны были представникы Стоваришыня «Руска Бурса» в Ґорлицях і радия ЛЕМ.фм: Наталия Малецка-Новак, Петро Медвід і Даміян Трохановскій.

Новый розклад публичной комунікациі в Ґорлицях

Ґорлицкій Містный Комунікацийный Заклад рішыл змінити од 1. жолтня/октобра розклад ізды так, жебы пасажеры желізниці могли без проблемів доіхати до і зо стациі в Заґужанах. Нецілы три тыжні тому спілка ввела новый розклад леній, якій не одповідал желізницьовым соспільникам. Жадали такого зложыня розкладу, жебы пасажеры желізниці, Ґорличане і туристы, высідаючы на стациі Ґорлиці – Заґужаны могли ся легко достати до центра Ґорлиц і назад. Головны увагы тыкали часу одіздів і браку єднорідных курсів в вікенды. В новым розкладі были взаты до увагы і вікендовы курсы, і зміна годин інчых автобусів на барже оптимальны для зліпшыня публичной комунікациі.

Закрыта біциґльова стежка Розстайне – Незнайова

Маґурскій Нацийональный Парк поінформувал, што до 10. жолтня/октобра біциґльова стежка на одтинку Розстайне – Незнайова єст закрыта для пішого, роверового і кінного руху. На трасі веденый єст актуально ремонт верхньой верствы шляку.

Нове чысло «Маґуры»

Вышол черговый номер часопису «Маґура» на місяці липец-вересен. Чытати мож в ним м.ін. о рідкых і хороненых ґатунках рослин і звірят выступуючых в Маґурскым Нацийональным Парку, о еколоґічній кризі, лісотерапіі і народній медицині, туристичных одзнаках та шырокій сіти туристичных шляків в Низкым Бескіді, якы оферуют можливіст познавати культуровы, історичны, ґеолоґічны і природничы цінности реґіону. На послідній страні традицийно найдете забаву для діти і дорослых з неочывидным розвязаньом. Часопис «Маґура» доступный єст до побраня на офіцияльным сайті Маґурского Нацийонального Парку. Єдночасно мож тіж придбати друкувану «Маґуру», напримір в сідибі Парку в Крампній.

Першы радийовы варштаты для діти в Рускій Бурсі в Ґорлицях

Припоминаме, же о нецілы два тыжні, в суботу 1. жолтня/окторба в будинку Руской Бурсы в Ґорлицях пройдут першы варштаты радийового кумшту для наймолодшых. Школіня для адептів радийового фаху зачне ся о 13.00 год. професийным розгрітьом голосу і ґамбы, пак участникы дознают ся, як зробити гавкаючого джінґля. А кєд найдут ся охочы молоды акторы, та вєдно з редакторами нашого радия награме радийове слуховиско. По школіню просиме на почастунок. Не маме віковых ограничынь. Родичів просиме присылати зголошыня до участи діти в варштатах на майльовый адрес radio@lem.fm.