Сумар дня на 19. січня/януара 2022 р.

Приносиме вам сумар медияльной ґрупы ЛЕМ.фм+ на ден 19. січня/януара 2022 р.

Ци Польша буде зобовязана узнати Шлезаків і Шлеск?

Ґрупа до справ традицийных меншын в Европейскым Парляменті займе ся в четвер, 20. січня/януара, темом шлезского языка і Шлезаків, што може закінчыти ся резолюцийом тыкаючом узнаня прав шлезской меншыны в Польщы. На стрічы пн. «Шлеск в Европі» выступувати будут: европосланец Лукаш Когут, якій кінцьом 2020 рока в Европейскым Парляменті выголосил по шлезскы пару речынь свого выступліня о неузнаваню Шлезаків в Польщы. Окрем него в Европейскым Парляменті выповідала ся буде проф. Малґожата Мыслівєц, котра розповіст про шлезску достоменніст і язык, о достоменности буде тіж бесідувал писменник Щепан Твардох та бывшый омудсман Адам Боднар, якій займе ся правным статусом шлезского языка і шлезской меншыны. Выступліня в Европейскым Парляменті на зобраню ґрупы до справ традицийных меншын, нацийональных соспільности і языків може закінчыти ся резолюцийом, котра вкаже Польщы обовязок офіцийно узнати шлезскій язык і шлезску меншыну. Такій документ не буде мал обовязуючого для выконаня характеру, але высловит опінію ґрупы або цілого Европейского Парляменту.

Соколы і Міхнік в Рускій Бурсі

Вчера в Рускій Бурсі в Ґорлицях з візитом пришла делеґация членів Спортового Товариства Сокіл з Ясла зо своім гостьом Адамом Міхніком. Шефредактор «Ґазеты Выборчой», а предовшыткым єден з передовых діячів демократичной опозициі за часів Польской Народной Республикы, был жыво заінтересуваный Лемками в контексті іх достоменностьовой окремости. Адам Міхнік, вєдно з членами Товариства Сокіл з Ясла візитували будинок бурсы, послухали про історию РБ, актуальну діяльніст і сучасну ситуацию Лемків в Польщы.

– бесідувал Адам Міхнік. Выразил він тіж надію, што іщы даколи поведе ся му вернути на Лемковину, жебы захоплювати ся єй красом і познати єй корінных жытелів.

Русиньскій король поп-арту незмінні популярный

Іщы лем пару найблизшых днів мож в сандецкій Ґалериі Сучасной Штукы БВА Сокіл обзерати выставу пн. «Там і назад». Є то нагода, жебы видіти творы самого Енді Варголя, найвыдатнійшого творці в світі в обшыри поп-арту. Експозиция тішыт ся великом популярністю не лем серед Сандеччан. Лем в грудни/децембрі минулого рока виділо єй 1400 осіб. Роботы презентуваны в Новым Санчы походят з колекциі Музею Сучасной Штукы Едні Варголя в Меджелабірцях. Веце як 170 обєктів то не лем образы, але тіж артефакты звязаны з родином артисты. Выстава є результатаом спілпрацы медже самоурядом малопольского воєвідства а Пряшівскым Крайом.

На торы!

Бєщадска Узкоторова Желізниця вертат на торы в періоді зимовой перервы в шкільных занятях. Зачынат курсувати од днес, а послідній курс пройде в суботу, 26. лютого/фебруара. Буде курсувала в кажду середу і суботу, як заповіл Мариюш Верміньскій – презес фундациі, яка заряджат Бєщадском Лісовом Желізницьом. Подібні як в попередніх роках, поізд буде іздил на трасі Майдан-Бальниця-Майдан. Прогулька тырват близко дві годины. Презес додал, што фундация допущат можливіст замовити потяг векшыма зорґанізуваныма ґрупами в інчы дни тыжня. Минулого рока желізниця перевезла 168 тис. осіб, найвеце пасажырів в своій істориі.