Сумар дня на 19. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 19. серпня/авґуста 2024 р.

Новый обєкт в любовняньскым скансені

В любовняньскым скансені мож видіти жывот русиньскых дротарів. До Музею Народной Архітектуры під градом Любовня на Пряшівскій Руси прибыл новый обєкт, котрым є хыжа з Камюнкы. В деревяным домі мож посмотріти на жывот дротарів, котрыма тото русиньске село ся прославило. Хыжа з Камюнкы, котра была удоступнена одвиджаючым скансен, то зрубовый дім, збудуваный в 1934 році. Актуально музей презентує в ним експозицию під назвом «Дротаре одходят». Більше на тоту тему прочытате в дописі на нашым портали.

Трансграничный проєкт «Драпіжне погранича»

Уж неодолга зачынат ся реализация проєкту «Драпіжне погранича», в котрый заанґажуваных єст 19 підметів з Польщы і зо Словациі, головні нацийональны паркы і надлісництва. Єдным з партнерів проєкту єст Маґурскій Нацийональный Парк. Реализация проєкту зачне ся в вересни/септембрі тр. і потырват нецілы два рокы. Головном цілю проєкту єст анализа і охорона стану популяциі великых драпіжників, такых як медвід, волк і рысь. Окрем того має ся тіж причынити до звекшыня еколоґічной свідомости і акцептациі серед локальных жытелів і туристів для ґатунків обнятых охороном. В рамках проєкту будут зрыхтуваны базы даных, модель заряджаня популяцийом та систем выміны даных тыкаючый транслокациі драпіжників на обшыри Польщы і Словациі. До досліджынь буде схоснувана штучна інтеліґенция. Побераный буде ґенетичный материял до бадань, што позволит уникнути парократного порахуваня єдного звіряте, котре ся перемістило. Дотля досліджыня популяциі драпіжників основаны были лем на обсервациі. Подля дотеперишніх анализ іх чысло в Маґурскым Нацийональным Парку остає незмінене. Актуально в парку сут сва ґавруючы брунатны медведі, три ватагы волків – разом 29 особників і 4 дорослы рысі.

«Юрий Новосільскій – поворот домів»

В найближшый четвер 22. серпня/авґуста в Ґалериі Штукы Двір Карвациянів в Ґорлицях одбуде ся вернісаж выставы пн. «Юрий Новосільскій – поворот домів». Вернісаж зачне ся о 18.00 год. Выстава походит з колекциі Нацийонального Музею в Кракові. То першый раз, коли творчіст Юрия Новосільского, знаменитого маляря, рисовника, сценоґрафа, але тіж теолоґа, а для вельох – найвыдатнійшого сучасного маляря ікон, буде шыроко презентувана так близко його рідной землі – лемківской Одреховой, одкале был отец Новосільского. Краєвиды Лемковины з єй архітектуром мож стрітити на вельох образах артисты. Експозиция вказувана в Ґорлицях буде ся складала з 24 малярскых творів. Выставу в Дворі Карвациянів буде мож обзерати до 13. жолтня/октобра тр.

«4 страны Карпат» в Ґорлицях

Уж в тот вікенд, 24. і 25. серпня/авґуста на ґорлицкым рынку одбуде ся 10. едицию фестівалю «4 страны Карпат». На подію просят Ґорлицкій Центр Культуры при спілпрацы з Містецкым Урядом міста Ґорлиці. Через два дни в місті світла мож буде чути фолькову музику з погранича культур. Того рока на сцені выступлят ансамблі Tolhaje, Vołosi, Village Orchestra i Sokół Orchestra, котры презентуют модерный фольк. Додатково подіі товаришыт ІІ Туристичный Торг маркы Karpating, варштаты робліня медівників ци варштаты кльоцковой коронкы та деґустация реґіональных продуктів.