Сумар дня на 19. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 19. серпня/авґуста 2021 р.

Польска Гуманітарна Акция орґанізує поміч для жытелів Афґаністану і Гаіті 

Од парох дни очы цілого світа звернены сут в страну Афґаністану, де найновшы подіі змусили тисячы жыючых в тій державі втікати. В поміч пошкодуваным заанґажувало ся многє чысло орґанізаций з цілого світа, в тым тіж Польска Гуманітарна Акция, котра одраз зачала своі діяня. Орґанізация припоминат тіж о землетрясіню, котре проходило на Гаіті 14. серпня/авґуста, де тисячы остали без хыж, ліків і чыстой воды, а ратунковій акциі перешкаджают тропікальны бурі. Цілю орґанізациі єст зобрати 300 тис. зл, котры будут презначены на скору поміч жытелям обох держав.

«Бескід без кіту» – спектакль молодіжньой театральной ґрупы з Устя Руского мож буде видіти іщы раз 

14. серпня/авґуста в Мазярскій Загороді в Лоси прошла премєра представліня молодіжньой театральной ґрупы з Устя Руского. Артисты запрезентували спектакль, котрый возник на основі книжкы «Бескід без кіту» авторства Мариі Стшелецкой. Заінтересуваня ним і чысло тых, котры пришли го видіти, зачудували самых орґанізаторів. З той причыны рішено іщы раз вказати спектакль в суботу, 21. серпня/авґуста, о 17.00 год. в Мазярскій Загороді в Лоси, вступне злотівку. В проєкт заанґажувало ся вельо осіб з околиц Устя і не лем, тіж сама авторка книжкы. Театральном опікунком ґрупы і авторком сценария єст Моніка Бабуля, о музичну оправу задбал Мирослав Боґонь, а вокально рыхтує ґрупу Юлия Дошна, котру так само можна видіти на сцені.

Зо Ждыні до Ґорлиц в часі пішого поломництва на праздник св. Максима Ґорлицкого

Братство Православной Молодежы Перемыльско-Ґорлицкой Єпархіі просит на четверте піше поломництво на праздник св. Максима Ґорлицкого. Поломництво з благословліня владыкы Паісия пройде 5. вересня/септембра. Зачне ся о 6.00 год. літургійом в церкви Покровы Пресвятой Богородиці в Ждыни, пак поломникы рушат до Ґорлиц, через Ґладышів, Маластів, Новицю, Білянку, Шымбарк і Ропицю Польску. О 18.00 год. в катедральній церкви Святой Тройці в Ґорлицях зачне ся Всеночна. Записы на поломництво тырвают до 4. вересня/септембра. Охочы прошены сут контактувати ся з вызначеныма особами телефонічні або майльом. Більше деталів находит ся на фейсбуковым сайті Братства.

«Ден в Кривій» – спільне святкуваня 20-літя істнуваня Стошаришыня для Кривой

Стоваришыня Розвитку Шолтыства Крива просит на «Ден в Кривій». Подія одбуде ся 22. серпня/авґуста з нагоды 20-літя істнуваня Стошаришыня. В проґрамі находят ся прелекциі на тему стоваришыня, варштаты гончарства і спільне караоке. Додатково в часі стрічы можна буде попрібувати реґіональны продукты. Подія зачне ся о 16.00 год. в Центрі Лыжных Бігів.