Сумар дня на 19. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 19. серпня/авґуста 2020 р.

Інтернетова збірка фінансів на церков в Перегримці

Православній парохіі св. Михала Архангела в Перегримці повело ся зобрати заложену суму 20.000 злотых в інтернетовій збірці на сайті zrzutka.pl. Лемківска громада, зосереджена при тій парохіі, уж парунадцет років старат ся о необхідны ремонты святыні, а завдякы людям доброй волі консервуваны сут поєдны елементы выпосажыня і розпису церкви. Як подают орґанізаторы фінансовой збіркы на ремонт перегримского православного храму, і того рока плянуют продолжати дальшы роботы. Ґу тому позыскали дотацию на консервацию престола і розпису західньой стіны церкви в высоті 45.000 злотых з Уряду Ґміны в Осєку Ясельскым і з Підкарпатского Уряду Охороны Забытків. Плянуваны консервациі сут необхідны, понеже в старіючым ся храмі видно деґрадацию малярской структуры, а і присутніст жуків дровноідів. Хоц прошена сума грошів, яка была анонсувана в маю того рока, назберана перед часом, за што парохія дякує на своім фейсбуковым сайті, збірку іщы мож підпорити, вплачаючы офіру через порталь zrzutka.pl. За тото парохія буде мала дяку зробити аж і більше, як заплянувано на початку.

Свято кашебской фаны

Вчера, 18. серпня/авґуста, Кашебы святкували свій нацийональный праздник – Свято Кашебской Фаны. То на памят подій з 1929 рока, коли кашебскы діячы рішыли основати Реґіональне Зъєднаня Кашебів, а при тым бороти ся о своі права і вызнаня окремости. Хоц власти наказали зняти завішену товды кашебску фану, активісты новооснованой орґанізациі тому ся не підчынили. Во вчерашній ден праздника фана была вынесена на Градовій Горі в Ґданьску при одспіваню нацийонального гымну «Zemia Rodnô», але знимкы з пошануваным кашебскым прапором поміщали в социйальных сітях горды зо свойого походжыня Кашебы з цілого світа – од архіпеляґу Норденшельда на Карскым Мори по Канаду. На чорно-золоты кольоры кашебской фаны был тіж розсвітленый Палац Культуры і Наукы в Варшаві.

Форум з Крениці до Карпача

Економічный Форум буде того рока перенесеный з Крениці до Карпача, о чым поінформували орґанізаторы той великой медженародной стрічы. Рішыня про зміну локалізациі было одкладане до остатньой хвилі. Причыном перенесіня тогорічного Економічного Форуму з Крениці до Карпача є потреба максимальной безпекы гости перед коронавірусом. Іщы перед деякым часом орґанізаторы тогорічного Форуму бесідували, што постарают ся зо вшыткых сил, жебы традицийно подія одбывала ся в Креници, але причысліня новосандецкого повіту до тзв. червеной зоны конечно не позволило провести тоту подію в славным курорті тым більше, што на днес не мож окрислити, як долго Крениця і цілый новосандецкій повіт будут ся в ній находити. Першый Економічный Форум в Креници одбыл ся в 1992 р. Шторічна стріча представників економічных і політичных кругів з реґіону середньо-східньой Европы через рокы выросла з малой конференциі до найбільшого того рода конґресу в тій части Европы, на котрым од років сут складаны важны деклярациі, односячы ся до світа бізнесу, політикы і економікы.

Выливы в Гуменным

Вчерашнє пополудне не было щестливе для жытелів Гуменного на сході Словациі, де за короткій час впало 70 мм дощу на квадратовый метр, што спричынило ся до заляня великых обшыри міста, в котрым вода переливала ся по улицях. На поміч вышли пожарникы, працівникы дороговой адміністрациі і технічны службы міста. Бургомайстер Гуменного, Мілош Мерічко, скликал вечером специяльну комісию, окрисляючы ступін выливів на третій. Окрем того, засідал тіж кризисовый штаб. Во вчерашніх выливах потерпіли і околичны села, де окрислено 2. ступін выливів. Остережыня першого ступеня для Пряшівского і Кошыцкого Краів на Словациі обовязує днес до 18.00 год., а метеоролоґы проґнозуют од 20 до 40 мм опадів на квадратовый метр вчас короткодобых, але інтенсивных бурий. Особливе остережыня выдане єст для окресів Гуменне і Снина, де може піднести ся рівен воды і можливы сут дальшы выливы.