Сумар дня на 19. марця 2025 р.

Приносиме вам сумар медияльной ґрупы ЛЕМ.фм+ на ден 19. марця 2025 р.

Загальне зобраня членів Стоваришыня «Руска Бурса» в Ґорлицях

В найблизшу суботу 22. марця одбуде ся загальне зобраня членів Стоваришыня «Руска Бурса». То шторічна стріча, на котрій підсумовує ся діяльніст общества за попередній рік. Бурсакам будут представлены справописы (мериторичный, фінансовый і од Ревізийной Комісиі), а пак члены стоваришыня будут рішати, ци дати абсолюторию одходячому зарядови, веденому в миняючій каденциі Наталийом Малецком-Новак. Попри важности фінансовых справописів, котры для каждой інституциі сут обовязком, в меншыновых обставинах основном остає штоденна діяльніст, якой підсумуваня і результаты найдут ся в мериторичным справописі. На засіданю будут так само порушены актуальны справы і ведены проєкты, але і тото, што орґанізация плянує в близшым і дальшым часі. Цілю засіданя буде тіж накрислити текучы і будучы проблемы, а тіж выбрати новы власти орґанізациі.

Ювілейне выданя «Річника Руской Бурсы»

В рамках свойой дорічной діяльности Стоваришыня «Руска Бурса» выдало ювілейный, 20 номер наукового часопису «Річник Руской Бурсы». Выдавництво было печатане під редакцийом проф. Олены Дуць-Файфер. Тема посліднього Річника то: Лемківскы/русиньскы студиі в ХХІ ст. Авторства редакторкы публикациі єст статя «Основны переміны в обшыри лемкознавчого дискурсу за остатнє 25 років». Др габ. Анджей Зємба, автор вельох статій, опубликуваных в часописі од початку його істнуваня, написал допис пн. «Істория і історийоґрафія а лемківскы студиі в Польщы в остатніх 30 роках». В части дискурсу нашла ся тіж м.ін. статя до барз модерной і акутальной темы – «Анализа і клясифікация русиньской бесіды языковым модельом штучной інтеліґєнциі OpenAI Whisper” авторства проф. Павла Малецкого. Публикация, як традицийні, має медженародный характер, окрем авторів з польскых науковых осередків, в подлісднім выданю найдете тіж дописы науковців зо Словациі, Сербіі та ЗША. «Річник Руской Бурсы» єст до придбаня на сайті lem.fm або в бібліотеці Руской Бурсы, а в одкрытым доступі єст до почытаня на сайті journals.akademicka.pl.

Карпатска Писанка 2025

Выгорлятскiй Музей в Гуменным во співпрацы з Окресном Орґанізацийом Уніі Жен Словациі в Гуменным зрыхтували XXXIII річник музейной презентациі писанкарской традициі і кумшту карпатского реґіону «Карпатска писанка 2025». Вернісаж конкурсовой выставы з вручыньом нагорід одбуде ся уж заран в Ґалерийній Сали Ореста Дубая в Выгорлятскым Музею. На експозициі запрезентуваных буде 575 експонатів, выконаных в десятьох техніках на курячых, качачых, гусячых яйцях, а тіж на яйцях од пулькы ци, еґзотичного, ему. До актуальной едициі конкурсу зголосило ся 61 змагаючых зо Словациі, Польщы і Украіны. Выставу писанок буде мож обзерати до 27. квітня/апріля тр. Выставі товаришыти будут варштаты писанкарства і ярмак писанок.

Лемківско-Погіряньскій Великодній Ярмак

Мазярска Загорода в Лоси уж 15. раз просит на Лемківско-Погіряньскій Великодній Ярмак. Охочы продавати своі выробы можут ся записувати іщы до кінця того тыжня. Окрем клясичной ярмачной части в проґрамі подіі находят ся додатковы активности – розмаіты варштаты, турнір толчыня яєц, конкурс збераня яєчок для діти, концерт хору Cantores Carvatiani та Співочо-Інструментального Ансамблю Школы в Лоси і выстава плястичных робіт школярів той пляцівкы – «Карпатска розета». Великодній Ярмак в Лоси одбуде ся 6. квітня/апріля.