Сумар дня на 19. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 19. листопада/новембра 2024 р.

Карпатскє Товариство просит на інтернетову стрічу про Цифровый Архів Єжы Тура і Барбары Тондос

Карпатскє Товариство просит на єденадцету в тым році стрічу з циклю «Карпатскых стріч», котра пройде в четвер 28. листопада/новембра. Поведе єй Катажына Тур-Марцішук і Анджей Жыґадло, котры од років діяют для підтриманя та удоступніня долголітньой роботы Єжы Тура і Барбары Тондос. Бесіда о згромадженій нима фотоґрафічній документациі забытків з обшыри полудньово-східньой Польщы. Цифровый Архів Єжы Тура і Барбары Тондос єст єдном з двох приватных збірок здіґітализуваных фотоґрафій і документациі забытків доступных на нашій радийовій страні. Збірка в міру можливости єст дополнювана, зас ведучы мают надіют ся розшырити засобы о архіва дальшых дослідників. В часі подіі запрошены гості будут оповідати о початках проєкту цифрового архіву, якій єст його ціль, о трудах в діяльности. Схарактеризуют материял обох збірок і приближат жытя і діяльніст Єжы Тура і Барбары Тондос.

Місто Крениця хоче початком 2025 рока закінчыти формальности при закупі дворця PKP

Як передал бургомайстер Крениці, Пьотр Риба, як вшытко піде згідні з пляном, то початком 2025 рока місто перейме дворец PKP. Власти міста рахуют, же іщы на зламі рока підпишут першый нотарияльный акт, а пaру дни пізнійше акт, котрый потвердит уж власніст міста. На реализацию інвестициі місто забезпечыло в буджеті квоту 1 млн 800 тис. зл. Місто в будучым році буде могло зачати модернізацию дворця, на што дозволит дофінансуваня з Урдового Проґраму Одбудовы Забытків в высокости 3,5 млн зл. Дворец PKP по ремонті буде полныл функцию не лем почекальні для пасажерів желізницовой леніі, але тіж місця культуры. В будинку найде ся м.ін. Ляборатория Діалоґу ци выдовискова саля.

Тырват ремонт желізницовой леніі но. 108 Стружы-Коростенко

Як передала представничка PKP Польскы Желізницовы Леніі, роботы реализуваны сут на трасі леніі но. 108 Стружы-Коростенко на одтинках медже Тарновцьом і Саноком, Угерцями а Коростенком і Яслом а Бічом. На модернізацию леніі передали 26 млн зл. Роботы зосереджают ся на направах торів, ремонтуют перепусты ци поправляют параметры мостів. Цілю єст зліпшыня технічных параметрів леніі, што переложыт ся на якіст і час пасажерскых перевозів. Згідно з подаваныма інформациями, першый ремонтуваный одтинок медже Тарновцьом а Саноком зас буде хоснуваный під конец листопада/новембра. Подібні при одтинку медже Яслом а Бічом, закінчыня модернізациі плянуване єст до кінця того місяця. Кус долше, бо до 10. грудня/децембра будут тырвати роботы на одтинку Угерці-Коростенко.

В Высовій в церкви св. Архангела Михала одремонтували престіл

Як подало Повітове Староство в Ґорлицях – закінчыли ся консерваторскы роботы в цервки в Высовій. Одобраня робіт одбыло ся в минулым тыжни. В середу 13. листопада/новембра одбыло ся офіцийне одобраня консерваторскых і реставраторскых робіт памятникового выпосажыня православной цервки св. Архангела Михала в Высовій. В рамках задачы выремонтуваный был престіл з ІІ пол. ХІХ ст. В контроли ефектів робіт участ взяли: член Заряду Повітового Староства, представник Выділу Розвитку і Інвестиций Повітового Староства в Ґорлицях і Воєвідского Уряду Охороны Памятників в Кракові Делеґатуры в Новым Санчы. На реализацию задачы перезначено понад 100 тис. зл, з чого 90 тис. становило дофінансуваня з буджету Воєвідского Консерватора Памятників, решта квоты то дофінансуваня з Повітового Староства і власны середкы парохіі.

фот. Olek Remesz, Radio RDN Nowy Sącz