Сумар дня на 19. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 19. листопада/новембра 2021 р.

Вступне до Маґурского Нацийонального Парку дармо

Туристы не мусят уж купувати білетів входу на шлякы і природничы стежкы в Маґурскым Нацийональным Парку. Сут они дальше доступны, але од листопада/новембра до квітня/апріля, тє. в періоді коли туристичный рух єст меншый, парк резиґнує з побераня оплат. В літнім сезоні білет входу до Парку коштувал 6 злотых. Інакше рішыла того рока дирекция Бєщадского Нацийонального Парку. В попередніх роках поза головным сезоном (од половины квітня/апріля до половины листопада/новембра) не были побераны оплаты. В тым році вступне на шлякы єст платне. Як подал директор Бєщадского Нацийонального Парку – Рышар Прендкій, рішыня спричынене єст великыма коштами зимового удоступняня шляків, якы поносит Парк. Актуальный кошт білету то 8 злотых. Подібны рішыня підняли в тым році і інчы гірскы паркы, медже інчыма Татряньскій Нацийональный Парк.

Онляйновый выклад про карпаторусиньску спадковину

Русиньскє Стоваришыня Мінесоты просит на онляйнову подію, яка одбуде ся 4. грудня/децембра тр. на плятформі ZOOM. «Глядаючы свободы – Істория Мойой Карпаторусиньской Спадковины. Од Ґалициі до Iron Range Мінесоты» то тема, яку запрезентує др Мери Сороко. Жебы мочы послухати выклад, треба ся перше зареґіструвати.

Выстава знимок «Цмонтері Ґорлицкой Землі»

Музей Дворы Карвациянів і Ґладышів просит на выставу знимок пн. «Цмонтері Ґорлицкой Землі», яку мож обзерати в конференцийно-выставенничым осередку Каштель в Шымбарку уж од днес, 19. листопада/новембра. Фотоґрафіі, котры мож обзерати на выставі, походят з музейных збірок, были зроблены працівниками музею. Выстава буде одкрыта до 15. грудня/децембра тр.

Одкрыты записы на Лемковина Вінтер Трейль

Одкрыты уж сут записы на ІІІ eдицию зимовых бігів Лемковина Вінтер Трейль. Бігы одбудут ся 5. марця 2022 р., а іх центр буде ся находил тот раз в Івоничы. Орґанізаторы обіцюют, же трасы будут вести цілком новыма закутинами Низкого Безкіду, котры не сут знаны з осінньой едициі подіі. Про участників зрыхтуваны будут дві трасы долгости 35 і 15 км. В змаганях разом може взяти участ аж і 300 бігачів. Зголошыня будут приниманы до 27. лютого/фебруара будучого рока або до моменту, аж вшыткы місця будут заняты.

Выстава поварштатовых ікон в Музею Никыфора в Креници 

Од 28. листопада/новембра тр. в Музею Никыфора в Креници буде мож обзерати іконы, якы створены были в рамках тогорічных ХІІІ Медженародных Варштатів Іконописців Новиця – Криворівня. Участниками пленерів орґанізуваных од 2009 р. Стоваришыньом Приятелів Новиці сут артисты репрезентуючы православны і католицкы традициі з осередків іконописаня в Польщы, Украіні, Білоруси і Словациі. Спілорґанізаторами подіі сут Братство Грекокатолицкой Молодежы Сарепта, Катедра Сакральной Штукы Львівской Академіі Красных Штук, Студия Християньского Сходу та артисты звязаны з міньском працовньом IKONIQUE. Темом тогорічных варштатів был текст «Пісня над Піснями». Цілю артистів беручых участ в пленері єст одновліня іконы як літургічного образу, будучого важным елементом спільной традициі Церкви. Выставу буде мож обзерати до 17. січня/януара 2022 р.