Сумар дня на 19. липця/юлия 2024 р.

Приносиме вам сумар медияльной ґрупы ЛЕМ.фм+ на ден 19. липця/юлия 2024 р.

55. Фестіваль Русиньской Культуры «Еха Волчых Гір»

Уж днес в русиньскым селі Влич на Словациі зачынат ся 55. Фестіваль Русиньской Культуры «Еха Волчых Гір». Подія потырват три дни, а зачынат ся днес о 19.00 год. в Культурным Домі во Вличы. В днешнім проґрамі єст вернісаж фотоґрафій Патрициі Ґоссаниі пн. «Поворот до минулости Полонин», котрому будут товаришыти гудобны гості: Полонина і Домініка Новотна. Дальше одпрезентуваный буде фільм «Полонины – Еха минулости Карпат”», котрого режысерком є Домініка Новотна, вокалистка та докторантка в Інституті Русиньского Языка і Культуры на Пряшівскым Університеті, орґанізаторка фестіалю. Пак мож буде пообсервувати нічне небо з працівниками Выгорлятской Обсерваториі в Гуменным. Головный проґрам фестівалю пройде в суботу в ареалі при рыбнику во Вличы. Буде перегляд дітячых фольклорных колективів, проґрам з назвом «Мозаіка русиньского фольклору» – запрезентуют ся ансамблі: Русиньскє Тріо, Шамбрінці, Полонина, Стужіца і Сорочка, а на конец выступит Штефан Штець з ґрупом Файта. Пак буде забава з народном музиком при ватрі. Не бракне і додатковых атракций, такых як дискусийны панелі, выставы, ярмак, школа танця,буде і кулінарный конкурс. В неділю в тамтышній грекокатолицкій церкви буде служена Літургія, а пак одбуде ся концерт духовной пісні Шамбрінців. Пополудни буде мож взяти участ в познавчій прогульці «Волчыма Горами».

Вытягы в Щавнику рушат уж в будучым році

Нова лыжна стация в Щавнику мала бы рушыти в грудни/децембрі 2025 рока. Інвестор, PKL, підписал уж догваріня в справі достарыня части ґондольово-креселкового вытягу та дальшого креселкового вытягу. Осередок Родинной Рекреациі має служыти не лем любителям зимовых спортів, але і літнім туристам. В інфраструктурі мают ся находити біциґльовы трасы і інчы атракциі. За Яном Ґольбом, бургомайстром Мушыны, в порівнаню до того, што было перше в Щавнику, буде то о вельо векша інвестиция. Буде дакілько вытягів – ґондольова желізниця разом з креселками до стациі, до той части, котра уж там была, а іщы выже буде одкрытый креселковый вытяг. Єдночасно будут модернізуваны бічны орчыковы вытягы і будут так як дотля получены з Верхомльом. Кінцьовый кошт лыжной стациі і выкупленого терену може вынести в сумі аж і 150 млн злотых. Вытягы в Щавнику пляново мают быти частю великого лыжного проєкту PKL, котрый получыт стацию з верхом Креницкой Яворины.

Дикій волонтарият

Фундация Дикій Проєкт просит до участи в безплатным школіню “Дикій волонтарият”, котре буде тыкало першой помочы дикым звірятам та конфліктовых ситуаций на леніі чловек – звіря. Буде то нагода, жебы ввести новых волонтерів Фундациі і так само жебы помочы підопічным осередка регабілитациі. Занятя одбудут ся в Ґорлицях/Кривій о тыжден, в пятницю 26. липця/юлия, в годинах од 12.00 до 20.00. Обовязуют скоршы записы. Дрібниці найдете на фейсбуковым сайті Дикого Проєкту.

Мушына звекшат автобусову флоту

До ґміны Мушына трафило 5 електричных автобусів. Коштували понад 10 млн злотых, але 95% покрыли зовнішні фундушы. Самоуряд плянує, жебы част автобусів могла возити діти до ґмінных шкіл уж од початку нового шкільного рока. Окрем того мают служыти ґмінній комунікациі. Мушына фурт хоче в будучности створити завдякы флоті електричных автобусів спільну меджеґмінну комунікацию з Креницьом.