Сумар дня на 19. липця/юлия 2021 р.

Приносиме вам сумар медияльной ґрупы ЛЕМ.фм+ на ден 19. липця/юлия 2021 р.

Новы подіі в Креници

Як подал на своім фейсбуковым профіли бургомайстер Крениці Пьотр Рыба, на прошыня Маршалка малопольского воєвідства Вітольда Козловского одбыли ся в Кракові стрічы тыкаючы Крениці. Як поінформувал бургомайстер, од 1. до 3. вересня/септембра на креницкым дептаку буде проходил конґрес тыкаючый цифровой безпекы CyberSec. Од 3. до 5. вересня/септембра одбуде ся в Креници Европейскій Біговый Фестіваль. Окрем того, Соймик Воєвідства піднял рішыня в справі реализациі Малопольского Фестівалю Смаку, якій одбуде ся в Креници в першый вікенд вересня/септембра. На стрічы был тіж підписаный інтенцийный лист тыкаючый спілпрацы при орґанізациі 3. Европейскых Ігр – змагань, якы будут зорґанізуваны і в Креници. Завязана была і спілпраца при орґанізациі Фестивалю ім. Яна Кєпуры в Креници.

Тырвают публичны консультациі проєкту проґраму трансграничной спілпрацы Інтерреґ Польща-Словация 2021-2027

Маршалківскій Уряд Малопольского Воєвідства просит до участи в публичных консультациях проєкту проґраму трансграничной спілпрацы Інтерреґ Польща-Словация 2021-2027. Консультациі потырвают до 22. серпня/авґуста тр. В обшыр спертя в Малопольшы входят м.ін. ґорлицкій і сандецкій повіты, а по словацкій страні Пряшівскій Самосправный Край, Жыліньскій Самосправный Край і повіт Спишска Нова Вес в Кошыцкым Краю. Цілю тырваючых консультаций єст зобрати і оцінити опініі і увагы тыкаючы проєкту. До участи в консультациях прошены сут особы і інституциі заінтересуваны трансграничном спілпрацом медже Польщом і Словацийом, в тым м.ін. бенефіциєнты попередніх едиций проґраму, потенцияльны бенефіциєнты, представникы власти, самоурядів, позаурядовых орґанізаций, высшых шкіл, підприємців, реліґійных спільнот і фізичны особы. Увагы до проєкту мож зголосити через електронічный формуляр, якій доступный м.ін. на офіцийным вебсайті малопольского воєвідства.

Варштаты при часовій выставі «Никыфор»

В Музею Діалоґу Культур – Одділіню Нацийонального Музею в Кєльцях прошла вчера, 18. липця/юлия, перша едиия плястичных варштатів, якы товаришат одкрытій там часовій выставі пн. «Никыфор». Участникы варштатів мали нагоду призріти ся працам походячым зо збірок Округового Музею в Новым Санчы і Нацийонального Музею в Кєльцях. Цілю варштатів было заінспірувати участників творчістю Епифана Дровняка, жебы пак намалювали будинок Музею в стилю характерным для лемківского артисты, пізріли наново на архітектуру свойого міста.

На Яворині будуют видокову плятформу

На верху Креницкой Яворины тырвают роботы при будові найвысшого в околици видоковочо пункту. Нова видокова плятформа має притягнути туристів видоками на Татры і Сандецкій Бескід. Нараз помістит около 50 осіб. Одвиджаючы будут мати до диспозициі видоковы люнеты обернены на штырі стороны світа. Доступна буде і парунацетметрова зъізджальня для наймолодшых. Як подали Ґондольовы Желізниці Яворина Креницка С.А., вступ на обєкт буде дармовый, а вступне на плятформу не перекрочыт парох злотых. Одкрытя атракциі єст плянуване на початок серпня/авґуста того рока.